Vasai News : पालघर जिल्ह्यात घरोघरी नागरिकांना पाणी मिळावे, यासाठी जलमिशन योजना आखली गेली आहे. या अंतर्गत ग्रामीण भागातील तहानलेल्या १३ गावांसाठी २१ कोटीची योजनेची निविदा प्रक्रिया पूर्ण करून कार्यादेश देखील संबंधित कंत्राटदाराला देण्यात आले आहेत. लवकरच कामाला सुरुवात होणार असल्याने ग्रामीण भागातील नागरिकांना पाणी समस्येपासून लवकरच मुक्तता मिळणार आहे.

डोक्यावरील हंडा उतरणार...

एकीकडे पाण्यासाठी ग्रामीण भागातील जनतेला पायपीट करावी लागते. उन्हाळ्यात डोंगराळ भागातील वस्तीला अधिक फटका बसतो. दुर्भिक्ष्य निर्माण झाल्यास पाण्यासाठी वणवण सहन करताना महिलावर्गाचे हाल होतात.

डोक्यावर हंडा, कळशी घेत मैलभर चालावे लागते. त्यामुळे नागरिकांना घरोघरी पाणी मिळावे, म्हणून सरकारने जलजीवन योजना सुरू केली आहे. पालघर जिल्ह्यातील अनेक गाव-पाडे अद्यापही तहानलेले आहेत.

त्यांची तहान भागवण्यासाठी योजना जलदगतीने पूर्ण करण्याचे काम सुरू आहे. आमदार हितेंद्र ठाकूर, आमदार क्षितिज ठाकूर, आमदार राजेश पाटील यांनी पाठपुरावा केला. तसेच सरपंच असताना दिवंगत अरुण पाटील यांनी देखील ग्रामीण भागातील खेड्या-पाड्यातील गावांना पाणी मिळावे, म्हणून सातत्याने प्रयत्न केले होते.

योजनेत समाविष्ट गावांची नावे

पारोळ

मेढे

तिल्हेर

आंबोडे

माजिवली

आदणे

भिणार

शिरवली

करंजोन

कळंबोन

सायवन

देपीवली

वडघर