Mumbai News : बॅनरवर भावी मुख्यमंत्री लिहून कोणालाही मुख्यमंत्री होता येत नाही. यासाठी जनतेच्या हृदयात जागा निर्माण करावी लागते. नाना पटोले यांना मुख्यमंत्री व्हायचे असेल तर प्रथम त्यांना महाविकास आघाडीतून बाहेर पडावे लागेल; अशा शब्‍दात वने, सांस्कृतिक कार्य आणि मत्स्यव्यवसाय मंत्री सुधीर मुनगंटीवार यांनी नाना पटोले यांच्‍यावर निशाणा साधला आहे.

अखिल विश्व गायत्री परिवाराच्या वतीने नवी मुंबईत अश्वमेध महायज्ञाचे आयोजन खारघर येथे कारण्यात येणार आहे. याचे भूमिपूजन रविवारी (ता. ४) राज्यपाल रमेश बैस आणि कॅबिनेट मंत्री सुधीर मुनगंटीवार यांच्या उपस्थितीत पार पडले. या वेळी मुनगंटीवार यांनी नाना पटोले यांच्‍या भावी मुख्‍यमंत्रीच्‍या बॅनरवरील फोटोवर प्रतिक्रिया दिली.

...युती कधीही तुटणार नाही

आमची युती ‘अंबूजा’ सिमेंटपेक्षा मजबूत असून आमची युती कितीही तोडण्याचा प्रयत्न केला, तरी ती तुटणार नाही; असे वक्तव्य केले. सोबतच बॅनरवर भावी मुख्यमंत्री यावर आपली प्रतिक्रिया दिली.

नाना पटोले यांना मुख्यमंत्री व्हायचे असेल, तर प्रथम त्यांना महाविकास आघाडीतून बाहेर पडावे लागेल. कारण माहविकास आघाडीमध्ये अनेक लोक मुख्यमंत्री पदाचे स्वप्न पाहत आहेत; अशी टीका केली.