Kolhapur News : कोल्हापुरात जलसंपदा विभागाकडून शेतीसाठी लागणाऱ्या पाण्याची उपसाबंदी करण्यात आल्याने जिल्ह्यातील लाखो हेक्टर पिकांना धोका पोहोचण्याची भिती व्यक्त केली जात आहे.

दरम्यान कोल्हापूर जिल्ह्यात पाण्यावरून राजकारण सुरू झाल्याचे दिसून येत आहे. माजी ग्रामविकासमंत्री हसन मुश्रीफ यांनी जलसंपदा विभागावर गंभीर आरोप केला आहे. गळतीच्या नावावर दूधगंगा (काळम्मावाडी) धरणातील सात टीएमसी पाणी कर्नाटकला सोडून दिल्याचा आरोप हसन मुश्रीफ यांनी केला.

हसन मुश्रीफ यांनी जिल्ह्यातील पाणीसाठ्याविषयी माहिती देत जलसंपदा विभागावर मोठे आरोप केले. ते म्हणाले की, काळम्मावाडी धरणातील कर्नाटकला दिलेले पाणी शिल्लक असते तर कोल्हापूरला टंचाईच्या झळा बसल्या नसत्या. आताच्या पाणीटंचाईला राज्य सरकारच जबाबदार असल्याचे सांगत जलसंपदा विभागाने कोल्हापूरची वाट लावल्याचे ते म्हणाले.

कोल्हापूर शहराला सध्या दिवसाआड पाणी दिले जात आहे. तसेच जिल्ह्यात शेती पिकांना दिल्या जाणाऱ्या पाण्यावर काही काळ बंदी घालण्यात आली आहे. यासगळ्यात जिल्ह्यातील लोकांचे मोठे हाल होत आहेत. दरम्यान पाऊस आणखी काही दिवस लांबणीवर गेला तर परिस्थिती बिकट होण्याची शक्यता आहे. परंतु या सगळ्याला कारणीभूत जलसंपदा विभाग असल्याचे मुश्रीफ म्हणाले.

अधिकाऱ्यांची कसून चौकशी करा

दूधगंगा व वेदगंगा नदी, त्याचे दोन्ही कालवे, गैबी बोगदा कोरडे पडत आहेत. धरणात केवळ एक ते दीड टीएमसी पाणीसाठा शिल्लक आहे. पाऊस आणखी आठ- दहा दिवस लांबला तर परिस्थिती गंभीर होईल, असा इशारा देत त्यांनी पालकमंत्र्यांनी याकडे पूर्ण दुर्लक्ष केल्याचा आरोप केला.

उपसाबंदीने आपल्याकडे पिके करपत असताना कर्नाटकात मुबलक उपसा सुरू आहे. याला जबाबदार असणाऱ्या अधिकाऱ्यांची चौकशी करा, अशी मागणीही त्यांनी केली. काळम्मावाडी धरणाला गळती आहे, याकडे कोणीच लक्ष न दिल्याने दुधगंगा नदीतील पाणी कर्नाटकला गेल्याने त्या भागातील शेतकऱ्यांना मोठा फायदा होत आहे. परंतु उपसाबंदीमुळे नदीत पाणी असून कागल, राधानगरी तालुक्यातील शेतकऱ्यांवर संकट ओढवले असल्याचे मुश्रीफ म्हणाले.