परभणी ः जिल्ह्यातील मिरखेल (ता. परभणी) येथील शेतीपिकांचे अतिवृष्टी (Heavy Rain), सततचा पाऊस, परतीच्या पावसामुळे अतोनात नुकसान (Crop Damage) झाले आहे. मात्र तरीही शासनाकडून मदत दिली जात नाही. त्यामुळे संतप्त शेतकऱ्यांनी शनिवारी (ता.१५) पाणी साचलेल्या पिकांमध्ये अर्धनग्न आंदोलन करत तत्काळ मदत देण्याची मागणी केली.

मिरखेल येथील शेतकऱ्यांच्या सोयाबीन, कपाशी, तूर आदी पिकांचे आधी अतिवृष्टी, सततचा पाऊस, त्यानंतर पावसाच्या खंडामुळे मोठे नुकसान झाले. त्यात शुक्रवारी (ता.१४) झालेल्या मुसळधार पावसामुळे हाती आलेले सोयाबीनचे पीक वाया गेले आहे.

कापणी केलेली तसेच उभी पिके पाण्यात बुडाली. त्यामुळे सरसकट शेतकऱ्यांना दिवाळीपूर्वी १०० टक्के विमा भरपाई तसेच भरीव आर्थिक मदत द्यावी, या मागणीसाठी शेतकऱ्यांनी हे आंदोलन केले.