नंदुरबार : केंद्र व राज्य शासनाच्या कृषी विभागाने राष्ट्रीय अन्नसुरक्षा अभियान (प्रमाणित बियाणे वितरण) व कृषी उन्नती योजना (Agricultural Upnati Yojana) (ग्राम बीजोत्पादन कार्यक्रम)अंतर्गत नंदुरबार जिल्ह्यासाठी रब्बी हंगामासाठी एक हजार १४३ क्विंटल हरभरा व ७२५ क्विंटल गव्हाचे प्रमाणित बियाणे अनुदान उपलब्ध करून दिले असून, शेतकऱ्यांनी या योजनेचा लाभ घ्यावा, असे आवाहन अधीक्षक कृषी अधिकारी नीलेश भागेश्वर यांनी केले आहे.

प्रमाणित बियाणे वितरणअंतर्गत पाच एकर व ग्राम बीजोत्पादन कार्यक्रम या योजनेंतर्गत एक एकर बियाणे अनुदानावर देण्यात येणार आहे. २० किलो बियाण्यावर ५०० रुपये अनुदान, तर एक एकरसाठी शेतकरी हिस्सा ९०० रुपये राहील.

कृषी उन्नती योजना हरभरा दहा वर्षांच्या आतील वाण बियाणे राजविजय-२०२, फुले विक्रम, फुले विक्रांत, एकेजी-११०९ (पीडीकेव्ही कांचन) एक एकरसाठी लागणाऱ्या २० किलो बियाण्यावर ५०० रुपये अनुदान, तर एक एकरसाठी शेतकरी हिस्सा ९०० रुपये राहील.

बीडीएनजीके-७९८ (काबुली)साठी एक एकरसाठीच्या ३० किलो बियाण्यावर ७५० रुपये अनुदान, तर एक एकरसाठी शेतकरी हिस्सा दोन हजार ५५० असेल. हे बियाणे जिल्ह्यातील महाबीज बियाणे विक्रेत्यांकडे उपलब्ध करून दिलेले आहे.