अॅग्रोवन वृत्तसेवा
Banana : जळगाव : खानदेशात आगाप कांदेबाग केळी पिकातून काढणी सुरू आहे. यंदा केळी काढणीच्या दिवसांमध्ये सणासुदीचे दिवस असल्याने उठाव कायम राहील. शिवाय कांदेबाग केळीची आवक खानदेशात कमी असते. यामुळे दर टिकून राहतील, अशी स्थिती आहे.
केळीचे दर मागील महिनाभरापासून टिकून आहेत. कारण आवक कमी आहे. पिलबाग (खोडवा) व जुनारी (काढणी ९० टक्के पूर्ण झालेल्या बागा) केळी बागांमधून रावेर, यावल, मुक्ताईनगर, नंदुरबार व धुळ्यातून आवक कमी झाली आहे.

पुढे सणासुदीचे दिवस असून, दर्जेदार कांदेबाग केळीला उठाव असणार आहे. यंदा जुलैतही परदेशात केळीची निर्यात सुरू असल्यामुळे दरात फारशी पडझड झाली नाही. पौष्टिक फळ म्हणून केळीला ग्राहकांकडून कायम मागणी आहे. केळीची निर्यातही अद्याप सुरू आहे. सध्या स्थानिक किंवा राज्यातील विविध भागांत पाठवणुकीच्या केळीचे दर ८०० ते १८०० रुपये प्रतिक्विंटल, असे आहेत. किमान दर ८०० रुपयांवरच आहेत. केळीला उठाव कायम आहे. सध्या खानदेशात पिलबाग, जुनारी केळीमधील आवक प्रतिदिन ९० ते ९५ ट्रक (एक ट्रक १६ टन क्षमता) एवढी आहे. ही काढणी पूर्ण होत आली आहे. फक्त उशिरा लागवडीच्या नवती बागांमधून रावेर, यावल, मुक्ताईनगर, धुळ्यातील शिरपूर, नंदुरबारमधील तळोदा, शहादा, अक्कलकुवा भागात काढणी सुरू आहे.

लवकरच श्रावण महिना येणार आहे. तसेच गौरी, गणपती, नवरात्रोत्सव, लागलीच दसरा व दिवाळीचा सण असणार आहेत. या सणासुदीला धार्मिक बाबींमध्ये केळीची मागणी असते. शिवाय परराज्यात दिल्ली, पंजाब, उत्तर प्रदेश, काश्मिरातही केळीला उठाव आहे. यामुळे पुढील दोन ते अडीच महिने केळीचे दर टिकून राहण्याचा अंदाज वर्तवण्यात आला आहे.

सध्या आगाप कांदेबाग केळी पिकातून केळीची काढणी सुरू आहे. जळगाव जिल्ह्यात चोपडा, जळगाव, पाचोरा भागात ही काढणी सुरू आहे. धुळ्यातील शिरपुरातही आगाप कांदेबाग केळी पिकात काढणी सुरू आहे. केळीचे आगार म्हणून ओळख असलेल्या रावेर, यावल, मुक्ताईनगर या भागांत पुढील अडीच महिने केळीची आवक कमी राहणार आहे. या भागात कांदेबाग केळीचे उत्पादन अपवादाने घेतले जाते. यामुळे केळीचा पुरवठा कमी व मागणी अधिक, अशी स्थिती ऑगस्टअखेरिस तयार होऊ शकते, अशी माहिती मिळाली.