वर्धा : गाव नकाशे अतिशय महत्त्वाचा दस्ताऐवज (Digital Document) आहे. जिल्हा महसूल प्रशासनाने हे नकाशे डिजिटल (Digital Map) स्वरूपात करून अतिशय चांगले काम केले आहे. यामुळे पुढील किमान ५० वर्षे संबंधित गावांना नकाशे परत काढावे लागणार नाही, असे प्रतिपादन केंद्रीय वस्त्रोद्योग विभागाच्या सहसचिव प्राजक्ता लवंगारे-वर्मा यांनी केले.

महाराजस्व अभियानांतर्गत जिल्हाधिकारी कार्यालयाच्या वतीने सामाजिक न्याय भवन येथे ४८४ गावांचे डिजिटल नकाशे वितरण कार्यक्रम आयोजित करण्यात आला होता. त्यावेळी त्या बोलत होत्या. यावेळी जिल्हाधिकारी प्रेरणा देशभ्रतार, अप्पर जिल्हाधिकारी मनोजकुमार खैरनार, निवासी उपजिल्हाधिकारी अर्चना मोरे यांच्यासह जिल्ह्यातील सर्व उपविभागीय अधिकारी व तहसीलदार उपस्थित होते. गाव नकाशे व सातबारा डिजिटल होणे अत्यावश्यक आहे. महसूल विभागाने गेल्या काही दिवसात याबाबतीत चांगले काम केले आहे. त्यामुळे मालमत्ता धारक सर्वसामान्य नागरिक व शेतक-यांना याचा फायदा होणार असल्याचे पुढे बोलताना श्रीमती लवंगारे यांनी सांगितले.

महाराजस्व अभियानांतर्गत जिल्हयात दस्ताऐवज संगणकीकरणाचे भरीव काम झाले असल्याचे यावेळी जिल्हाधिकारी प्रेरणा देशभ्रतार यांनी यावेळी सांगितले. यावेळी मान्यवरांच्या हस्ते ४८४ गावांतील तलाठ्यांना डिजिटल गाव नकाशाची लॅमिनेशन केलेली प्रत वितरित करण्यात आली. या गावांचे तलाठी व मंडळ अधिकारी यांनी नकाशे स्वीकारले. बँक ऑफ इंडियाच्या सामाजिक दायित्व निधीतून डिजिटल नकाशे तयार करण्यात आले. यासाठी या बँकेने ७ लाख रुपयाचे अर्थसाहाय्य केले. याबद्दल यावेळी जिल्हा अग्रणी बँक प्रबंधक वैभव लहाने यांना प्रशासनाच्या वतीने आभार पत्र देऊन सत्कार करण्यात आला.