Solapur News : भाळवणी (ता. पंढरपूर) येथील सहकार शिरोमणी वसंतराव काळे सहकारी साखर कारखान्यासाठी शुक्रवारी (ता. १६) ९४.४० टक्के तर करमाळ्यातील भिलारवाडी येथील मकाई सहकारी साखर कारखान्यासाठी ५७ टक्के मतदान झाले.

आता या निवडणुकीची मतमोजणी रविवारी (ता. १८) होणार आहे. निवडणुकीच्या आधीपासूनच आरोप-प्रत्यारोपाने चर्चेत आलेल्या या कारखान्यांच्या निवडणूक निकालाकडे आता सर्वांचे लक्ष लागले आहे.

सहकार शिरोमणी सहकारी साखर कारखान्याचे विद्यमान चेअरमन कल्याणराव काळे यांना विठ्ठल साखर कारखान्याचे चेअरमन अभिजित पाटील यांनी आव्हान दिले आहे. काळे यांना भगिरथ भालके, युवराज पाटील, गणेश पाटील या युवा नेत्यांनी साथ दिली आहे.

तर अभिजित पाटील यांना प्रा. बी. पी. रोंगे, अॅड. दीपक पवार यांची साथ आहे. कारखान्यावरील कर्ज, शेअर्स या प्रश्नावरून पाटील यांनी काळे यांना लक्ष्य केले. गेली २२ वर्षे काळे यांची कारखान्यावर एकहाती सत्ता आहे, इथे अभिजित पाटील सत्ता परिवर्तन करणार का, याकडे सर्वांचे लागले आहे.

मकाई कारखान्यावर स्थापनेपासून बागल गटाची सत्ता आहे. पण यंदाच्या निवडणुकीत कारखान्याचे विद्यमान चेअरमन दिग्विजय बागल, माजी आमदार शामल बागल वा रश्मी बागल यांच्यापैकी कोणीही निवडणूक रिंगणात नव्हते.

बागल विरोधी गटाकडून प्रा. रामदास झोळ यांनीही बागल गटाला आव्हान दिले. पण ते स्वतःही निवडणूक रिंगणात नाहीत. त्यामुळे नेत्याऐवजी कार्यकर्त्यांमध्ये रंगलेल्या या निवडणुकीकडेही सर्वांच लक्ष लागले आहे.