संग्रामपूर, जि. बुलडाणा ः ‘एक दिवस बळीराजासाठी’ या उपक्रमाअंतर्गत सातपुड्याच्या पर्वतरांगेत महाराष्ट्र व मध्य प्रदेशच्या सीमेवर वसलेल्या भिंगारा गावात कृषी विभागाच्या अधिकाऱ्यांनी कार्यक्रम घेतला. या वेळी प्रामुख्याने रस्ता, वीज व संपर्कासाठी मोबाईल रेंजची अडचण असल्याचे गावकऱ्यांनी सांगितले.

अत्यंत दुर्गम असलेल्या भिंगारा या आदिवासी गावात कृषी उपसंचालक विजय बेतीवार, पोकरा प्रकल्प विशेषज्ज्ञ उमेश जाधव, जळगाव जामोद तालुका कृषी अधिकारी धीरज वाकोडे, संग्रामपूर तालुका कृषी अधिकारी अमोल बनसोडे, कृषी पर्यवेक्षक प्रभाकर बंड यांनी भेट दिली. या वेळी भिंगारा तेथील शेतकऱ्यांच्या विविध समस्या जाणून घेतल्या. या गावात महाडीबीटीअंतर्गत विविध योजना पोचवल्या आहेत. शेतकऱ्यांना मार्गदर्शन करताना बेतिवार यांनी पंतप्रधान सुक्ष्म अन्न प्रक्रिया योजनेअंतर्गत जास्तीत जास्त प्रस्ताव सादर करण्याचे आवाहन केले.