Solapur News पंढरपूर : चैत्र शुद्ध (कामदा) एकादशीनिमित्त श्री विठ्ठल-रुक्मिणी मातेच्या (Vithhal rukmini Darshan) दर्शनासाठी राज्यासह परराज्यांतूनही वारकऱ्यांची रविवारी (ता. २) पंढरपुरात मांदियाळी जमली. चंद्रभागा तीरासह नगरप्रदक्षिणा मार्ग आणि मंदिर परिसरासह सर्वत्र टाळ-मृदंगाचा गजर आणि हरिनामाच्या जयघोषाने अवघी पंढरी भक्तीने भारून गेली.

मंदिर समितीच्या वतीने श्री विठ्ठल-रुक्मिणीमातेची पहाटे नित्यपूजा झाली. श्री विठ्ठलाची नित्यपूजा मंदिर समितीचे सदस्य ह.भ.प. ज्ञानेश्‍वर महाराज जळगावकर यांनी कुटुंबीयांसमवेत, तर रुक्मिणी मातेची नित्यपूजा मंदिर समितीचे सदस्या ॲड. माधवी निगडे यांनी कुटुंबीयांसमवेत केली.

या एकादशीनिमित्त मंदिराच्या गाभाऱ्यात विविध फुलांची आकर्षक सजावट करण्यात आली होती.

श्री विठ्ठल-रुक्मिणी मंदिरातील दर्शनाची रांग आजही गोपाळपूर रस्त्यावरील पत्राशेडपर्यंत पोहोचली.

चैत्री एकादशीला वारकऱ्यांना सुलभ दर्शन व्हावे, यासाठी मंदिर समितीच्या वतीने आवश्यक उपाययोजना करण्यात आल्या. दर्शनरांगेतील वारकऱ्यांना मोफत खिचडी आणि ताक देण्यात आले.