Agriculture Inputs : तालुक्यातील व्यापाऱ्यांनी बनावट बियाणे व रासायनिक खताची विक्री केली असून, संबंधित विक्रेते व कंपनीवर गुन्हे दाखल करण्यात यावे, अशी मागणी काल (ता. १७) शेतकऱ्यांनी तहसीलदार नानासाहेब आगळे यांच्याकडे केली.

कापसाला भाव नसल्याने शेतकरी हवालदिल झालेला आहे. या दुःखातून शेतकरी बाहेर पडत नाही. तो लागलीच पेरणीनंतर त्याच्यावर बोगस बियाणे व खते यांनी संकटात टाकण्याचे काम केलेले आहे. जामनेर तालुक्यातील कृषी केंद्रात मोठ्या प्रमाणात बोगस बियाणे व खते विकली गेली.

त्यामुळे शेतकऱ्यांला कपाशी, सोयाबीन, मिरची या पिकांच्या वेगवेगळ्या समस्यांना सामोरे जावे लागत आहे. बोगस बियाणे दिल्यामुळे आज पिकांची वाढ होत नाही. कपाशी लाल, पिवळी, काळी पडत आहे. त्याबरोबर पिकांची वाढ सुद्धा खुंटली आहे. बोगस खतांमुळे पीक अक्षरशः जळून गेलेली आहेत.

त्यामुळे बोगस बियाणे व खते विकणाऱ्या कंपनी व कृषी केंद्रावर तत्काळ गुन्हे दाखल करा व शेतकऱ्यांना नुकसान भरपाई देण्यासाठी सरकारने प्रयत्न न करता अंमलबजावणी करून तत्काळ मदत द्यावी, या आशयाचे निवेदन जामनेर तालुक्यातील शेतकऱ्यांच्या वतीने करण्यात आले.

या वेळी तोंडापूर, फत्तेपूर, शेंगोळे, मोयखेडा, सामरोद परिसरातील असंख्य शेतकरी जामनेर युवासेना उपजिल्हाप्रमुख राहुल चव्हाण व शहरप्रमुख अतुल सोनवणे सहभागी होते. दरम्यान, रासायनिक खते व बियाणे कृषी कंपन्यांच्या राखीव ‘सीएसआर’ निधीतून या शेतकऱ्यांना तत्काळ मदत करावी, अशी मागणी युवा सेनेचे जिल्हा उपप्रमुख राहुल चव्हाण यांनी केली आहे.