Wada Kolam Paddy Cultivation वाडा, जि. पालघर : तालुक्यातील बहुद्देशीय शेती संस्थेच्या वाडा कोलम (Wada Kolam Paddy Verity) या वाणाला सन २१/२२ मध्ये राष्ट्रीय स्तरावर नामांकन प्राप्त झाले आहे.

त्यामुळे देशभरात वाडा कोलमची विक्री केली जात आहे. यामुळे बहुद्देशीय शेती उत्पादन संस्थेच्या सभासदांनी या वर्षांत सहा एकर क्षेत्रात वाडा कोलम वाणाची उन्हाळी लागवड (Paddy Cultivation) केली आहे.

बहुउद्देशीय शेती उत्पादन सहकारी संस्थेचे सभासद मोहन सावंत व विनायक सावंत या शेतकऱ्यांनी आंबिस्ते या गावी आपल्या सहा एकर क्षेत्र असलेल्या शेतीत वाडा कोलम व दोन एकरात सुरती कोलम या वाणांची उन्हाळी हंगामात लागवड केली आहे.

वाडा कोलमला राष्ट्रीय मानांकन प्राप्त झाल्यानंतर वाड्यातील शेतकऱ्यांकडून या वाणाची लागवड केली जात आहे. या वाणाला बाजारात चांगला भाव मिळतो. लहान, लांबट आकाराचा दाणा व सुवासिकपणा असल्याने वाडा कोलम व सुरती कोलमला भारतात व बाहेरील देशातून मागणी असते.

उन्हाळी भात लागवडीबद्दल वाड्यातील कृषी अधिकाऱ्यांकडून शेतकऱ्यांना मार्गदर्शन केले जात आहे. या उन्हाळी भातशेतीला निवृत्त जिल्हाधिकारी भालचंद्र ठाकरे व वैभव पाटील यांनी भेट देऊन सावंत बंधूनी वाडा कोलम लागवडीबाबत अन्य शेतकऱ्यांना मार्गदर्शन करावे, असे आवाहन केले.