Dharashiv News : काही विविध कार्यकारी सेवा सोसायट्यांवर अवसायनाची कारवाई सुरू झाली असून जिल्हा उपनिबंधकांनी त्यावर खुलासा केला आहे. पुन्हा एकदा लेखापरीक्षण करावे असा खुलाशात म्हटले आहे. काही संस्थानी जिल्हा बँकेकडे बोट दाखविले असून त्यांनी दाखविलेली तफावत चुकीची असल्याने आता त्याची खातरजमा करण्यात येणार आहे.  

जिल्हा बँकेकडून येणे-देणे व्यवहारामधील अनिष्ट तफावत बँकाकडून सहकार विभागाला दिली आहे. त्यानुसार ६० टक्क्याहून अधिक तफावतीच्या संस्थांवर अवसायनाची कारवाई अपेक्षित आहे. जिल्हा उपनिबंधक कार्यालयाकडून १९८ संस्थांना अंतरिम नोटीस देऊन म्हणणे मांडण्यासाठी कालावधी दिला. संस्थांनी म्हणणे सादर करत बँकेने काढलेली तफावत गृहित धरू नये अशी अपेक्षा व्यक्त केली आहे. संस्थेची एवढी तफावत नसल्याचे सांगण्यात येत असून जिल्हा उपनिबंधक यांच्यापुढे पेच निर्माण झाला आहे. जिल्हा बँकेने काढलेल्या तफावतीवरच संस्थानी आक्षेप घेतल्याने लेखापरिक्षकांकडून तपासणी करणे आवश्यक आहे. वस्तुस्थिती जाणून घेण्यासाठी नेमकी कोणाची बाजू खरी व कोण खोट सांगत आहे याची खातरजमा करावी लागणार आहे.

सेवा संस्था, जिल्हा बँक व्यवहारात अनेकदा गैरव्यवहार व अनियमितता झाली उघड आहे. प्रत्येकवेळी सेवा संस्थाच कशी जबाबदार असेल बँकेचाही हेतू तपासणे आवश्यक आहे. संस्थांच्या अंगाशी आल्यानंतर थेटपणे जिल्हा बँकेवर आक्षेप घेतला असून काय होणार हे पाहणे महत्त्वाचे ठरणार आहे. जिल्हा बँकेची स्थिती पाहता संस्था व्यवहारामध्ये पारदर्शकता न पाळल्यानेच स्थिती झाल्याची बाजू कायमपणे समोर आली आहे. संस्था जेवढी जबाबदार तेवढाच बँकेचा कारभारसुद्धा जबाबदार असल्याचे संस्थांच्या प्रतिनिधीचे म्हणणे येत आहे.