Nagar Weather News : महिना-सव्वा महिन्यापासून गायब असलेला पाऊस सुरू झाला आहे. मात्र नगर जिल्ह्यातील अकोले तालुक्यातील आदिवासी पश्चिम भाग सोडला, तर अजूनही जिल्ह्यात जोरदार पाऊस नाही. दोन दिवसांपासून पावसाची रिपरिप सुरू आहे. मात्र जोरदार पाऊस नाही. दोन दिवसांपासून ढगाळ वातावरण असून, अधूनमधून पावसाची संततधार पडते.

नगर जिल्ह्यात गेल्या महिना-सव्वा महिन्यापासून पावसाचा खंड होता. त्यामुळे खरिपाच्या पिकांचे नुकसान झाले आहे. सव्वा महिन्याच्या खंडानंतर नगर जिल्ह्यात दोन दिवसांपासून पावसाचे वातावरण तयार झाले असले, तरी अजूनही जोरदार पाऊस नाही. शनिवारी (ता. ९) सकाळी सहा वाजेपर्यंत झालेल्या नोंदीनुसार सर्वच महसूल मंडलांत पावसाची नोंद झाली,

मात्र जोर नव्हता. कोपरगाव, अकोले, नेवासा, जामखेड, शेवगाव, नगर तालुक्यांतील काही भागात बऱ्यापैकी पाऊस झाला. मुळा, निळवंडेत ८० टक्के पाणीसाठा असून भंडारदरा शंभर टक्के भरलेले आहे. ही धरणे वगळता जिल्ह्यात अन्य धरण, गाव तलाव, पाझर तलाव व अन्य स्रोत कोरडाठाक आहेत.

अकोले तालुक्यातील घाटघर, रतनवाडी व अन्य भागांत पाऊस सुरू आहे. शनिवारी (ता.९) सकाळी सहा वाजेपर्यंत घाटघरला १२८ मिलिमीटर, रतनवाडीला ९७ मिलिमीटर, पांजरे येथे ७९ मिलिमीटर, वाकी येथे ४३ मिलिमीटर, भंडारदरा येथे ६७ मिलिमीटर, निळवंडे येथे ३६ मिलिमीटर, आढळा येथे १५ मिलिमीटर पावसाची नोंद झाली आहे.