Pune Weather News : गेल्या सव्वा महिन्यापासून पावसाने दडी मारली. त्यामुळे अनेक ठिकाणी पिके सुकत असून पावसाअभावी पिके जळून चालली आहेत. या पिकांना जीवदान देण्यासाठी जलसंपदा विभागाकडून सात धरणांतून आवर्तन सोडण्यात आले आहे.

जिल्ह्याच्या पूर्व भागात अजूनही जोरदार पाऊस झालेला नाही. दोन दिवसांपूर्वी काही भागात हलका पाऊस पडला. धरणक्षेत्रात पावसाचा जोर कमी आहे. जलसंपदा विभागाच्या सूत्रांनी दिलेल्या माहितीनुसार, मुठा खोऱ्यातील चार धरणक्षेत्रांत मागील दोन दिवसांपासून हलका पाऊस पडत आहे.

रविवारी (ता.१०) सकाळी आठ वाजेपर्यंतच्या २४ तासांत टेमघर धरणक्षेत्रात २७, वरसगाव १४, पानशेत १४ तर खडकवासला धरणक्षेत्रात एक मिलिमीटर पाऊस झाला. खडकवासलातून डाव्या २४१ क्युसेक तर, उजव्या कालव्याला १००५ क्युसेकने पाणी सोडण्यात आले आले.

नीरा खोऱ्यातील गुंजवणी, नीरा देवघर, पवना, वडिवळे या धरणक्षेत्रात मध्यम पाऊस पडला. तर कासारसाई, कळमोडी, चासकमान, भामा आसखेड तुरळक सरी पडल्या.

चासकमानमधून डाव्या कालव्याला ५६० क्युसेक, वीर धरणांतून डाव्या कालव्याला ८२७ क्युसेक, उजव्या कालव्याला १५५० क्युसेकने विसर्ग सोडला आहे. कुकडी खोऱ्यातील पिंपळगाव जोगे, माणिकडोह, वडज, येडगाव, डिंभे, चिल्हेवाडी, घोड धरणक्षेत्रात १.१९ टीएमसी पाण्याची आवक झाली आहे.

पिंपळगाव जोगे धरणांतून डाव्या कालव्यात २६० क्युसेक, वडजमधून डाव्या कालव्यात २०५ क्युसेक, डिंभेतून डाव्या कालव्यात ६००, उजव्या कालव्यात १८० क्युसेक, घोड धरणांतून डाव्या कालव्यात ४५० क्युसेक, उजव्या कालव्यात १५० क्युसेकने विसर्ग सोडला आहे.