Beed News : कपाशी व्यवस्थापनात जैविक पर्यायांचा वापर करण्याचा सल्ला खामगाव कृषी विज्ञान केंद्राचे शास्त्रज्ञ डॉ. श्रीकृष्ण झगडे यांनी दिला.

नाथापूर ता. जि. बीड येथे शनिवारी (ता. २२) ॲग्रोवन व कोरोमंडल इंटरनॅशनल लिमिटेड यांच्या संयुक्त विद्यमाने ॲग्रोवन संवाद कार्यक्रमाचे आयोजन करण्यात आले होते.

या कार्यक्रमात कपाशी पीक व्यवस्थापन या विषयावर खामगाव येथील कृषी विज्ञान केंद्राचे शास्त्रज्ञ डॉ. झगडे यांनी कपाशी पिकावरील एकात्मिक कीड व रोग व्यवस्थापन या विषयावर सखोल मार्गदर्शन केले.

कपाशी पिकामध्ये चिकटसापळे, कामगंध सापळे, पक्षी थांबे, ट्रायकोग्रामा कार्ड, विविध बुरशीजन्य कीटकनाशकांचे महत्त्वही डॉ. झगडे यांनी शेतकऱ्यांना पटवून दिले.

कोरोमंडलचे डॉ. विनेश रेगे यांनी योग्य वेळी आवश्यक असणाऱ्या खतांचा वापर करण्याचे आवाहन केले.

कोरोमंडल इंटरनॅशनलचे विभागीय व्यवस्थापक ज्योतिबा माने यांनी कंपनी व खताबाबत सविस्तर माहिती दिली. या चर्चासत्रास प्रगतशील शेतकरी संजय चव्हाण, रितेश घवाडे, भागवत रडे, विनोद गिराम, रजाक सय्यद, कोरोमंडलचे बाबूराव माने, ललित पाटील, अप्पासाहेब वाबळे, गणेश वारे, स्वप्नील लोंढेसह मोठ्या संख्येने शेतकरी वर्ग उपस्थित होता. ॲग्रोवनचे प्रतिनिधी बालाजी थोडसरे यांनी कार्यक्रमाचे सूत्रसंचालन करून उपस्थितांचे आभार मानले.