Agriculture Electricity पुणे : उत्तर पुणे जिल्ह्यात आतापर्यंत बिबट्याच्या हल्ल्यात (थLeopard Attack) अनेक जनावरे आणि माणसे दगावली आहेत. शेतकऱ्यांमध्ये बिबट्याची दहशत (Leopard Terror) आहे.

तरीही वीज वितरण कंपनी आठवड्यातील चार दिवस रात्रीचा शेतीला वीजपुरवठा (Electricity) करत असल्याने शेतकऱ्यांना बिबट्याच्या दहशतीत रात्री पिकांना पाणी भरावे लागते.

शेतीपंपासाठी दिवसा वीजपुरवठा करावा, अन्यथा आंदोलन करण्याचा इशारा आंबेगाव तालुका स्वाभिमानी शेतकरी संघटनेचे तालुका अध्यक्ष प्रभाकर बांगर यांनी दिला आहे.

सध्या बिबट्याच्या हल्ल्यामध्ये मोठ्या प्रमाणात वाढ झाली आहे. यात अनेक नागरिकांना आपला प्राण गमवावा लागला आहे. अनेक नागरिक जखमी झाले आहेत. पाळीव प्राण्यांवरदेखील मोठ्या प्रमाणात हल्ले होत आहेत.

अनेक जनावरे जखमी झाली आहेत. मेंढपाळ समाज देखील भयभीत झाला असून त्यांनी या भागातून काढता पाय घेतला आहे.

अशा परिस्थितीमध्ये शेतकऱ्यांना रात्री अपरात्री शेतीला पाणी द्यावे लागते आणि रात्रीच्या वेळी बिबट्या भक्ष्य शोधण्यासाठी बाहेर पडत असतो. त्यावेळी अनेक शेतकऱ्यांवर हल्ले होऊन शेतकऱ्यांचा जीव गेला आहे.

त्यामुळे आंबेगाव तालुका आणि परिसरामध्ये शेतकरी व सर्वसामान्य नागरिकांमध्ये प्रचंड भीतीचे वातावरण आहे.

या भागातील शेतकरी व नागरिकांना न्याय मिळवून देण्यासाठी आणि शेतीला दिवसा वीजपुरवठा सुरू करण्यासाठी स्वाभिमानी शेतकरी संघटना शेतकऱ्यांना घेऊन आंदोलन उभे करणार आहे.