मेहकर, जि. बुलडाणा : हजारो नागरिकांची तहान भागवणाऱ्या कोराडी मध्यम सिंचन प्रकल्पाच्या (Koradi Irrigation Project) सांडव्याच्या भिंतीत वाढलेली झाडेझुडपे तोडल्यामुळे भिंतीला भगदाडे पडली आहेत. त्यातून झिरपणाऱ्या पाण्याचा मोठ्या प्रमाणात अपव्यय होत असून दुरुस्तीची तातडीची गरज आहे. या भगदाडांमुळे प्रकल्पाच्या भिंतीला धोका निर्माण झाला आहे.

१९९० च्या दशकात कोराडी हा महत्त्वाकांक्षी सिंचन प्रकल्प बांधून तयार झाला होता. हे धरण मातीचे आहे. तीन हजार हेक्टरपेक्षा अधिक जमिनीला सिंचन सुविधा आणि मेहकर शहरासह शंभरावर गावखेड्यांना या प्रकल्पातून पाणीपुरवठा होतो. त्यामुळे हा प्रकल्प महत्त्वाचा आहे. यावर्षी प्रकल्प पूर्णपणे भरला आहे.

सांडव्याची भिंत मातीची आहे. काही बांधकाम सिमेंटमध्ये करण्यात आले आहे. सांडव्याच्या भिंतीत वाढलेली झाडेझुडपे तोडण्यात आल्याने त्याजागी भगदाडे पडली आणि त्यातून पाणी झिरपणे सुरू झाल्याने भिंत फुटण्याचा धोका निर्माण झाला आहे. अनेक ठिकाणाहून पाण्याचे पाझर सुरू झाल्याने त्वरित दुरुस्तीची मागणी करण्यात येत आहे. पाण्याच्या मोठ्या अपव्ययामुळे नाराजी व्यक्त होत आहे.

‘दुरुस्ती कामावर निगराणी ठेवणे गरजेचे’

मागील काळात कालवा दुरुस्तीसाठी मोठा निधी शासनाने सिंचन विभागाला दिला होता. परंतु थातुरमातूर कामे करण्यात आल्याने शेती सिंचनासाठी पाणी सर्व भागात जाऊ न शकल्याने शेतकऱ्यांमध्ये असंतोष होता. तक्रारी करूनही चौकशी, कार्यवाही झाली नाही.त्यामुळे आता सांडवा भिंतीच्या दुरुस्तीसाठी निधी मंजूर झाला तरी हे काम केले जाईल की नाही याबाबत जनतेत साशंकता आहे. वरिष्ठांनी दुरुस्ती कामावर निगराणी ठेवणे गरजेचे राहणार आहे. प्रकल्पाचे स्थानिक अधिकारी सांडव्याला पडलेल्या भगदाडांच्या दुरुस्तीबाबत बोलायला तयार नाहीत.