Pune News ‘‘गेल्या वर्षभरात पुणे विभागातील पुणे, सातारा, सांगली, कोल्हापूर, सोलापूर जिल्ह्यांतील मोजणी, सनद, प्रॉपर्टी कार्डाच्या नकला यातून ९५ कोटी ६२ लाख रुपयांचा महसूल (Revenue) मिळाला आहे,’’ अशी माहिती भूमी अभिलेख विभाग (Bhumi Abhilekh Department) पुणेचे उपसंचालक अनिल माने यांनी दिली.

पुणे विभागात २०२२ ते २०२३ या आर्थिक वर्षात विविध मोजणीची प्रकरणे, प्रलंबित प्रकरणे आणि निकाली काढण्यात आलेल्या प्रकरणांचा आढावा भूमी अभिलेख विभागाने घेतला आहे.

पुणे विभागाच्या भूमापन विभागाकडे ३१ मार्च २०२२ पूर्वी ४८ हजार ६७० मोजण्यांची प्रकरणे शिल्लक होती. या वर्षभरात ६८ हजार ६०३ मोजणीची प्रकरणे नव्याने आली.

त्यामुळे १ लाख १७ हजार २७३ मोजणी प्रकरणांपैकी ८१ हजार ३६७ मोजणीची प्रकरणे निकाली काढण्यात आली.

३५ हजार ९०६ मोजणी प्रकरणे अद्याप शिल्लक आहेत. सहा महिन्यांतील मोजणीची प्रकरणे निकाली करण्याचे उद्दिष्ट ठेवण्यात आले होते, अशी माहिती माने यांनी दिली.