Solapur News : स्वच्छतागृह बांधून तयार आहे परंतु लाभार्थ्यांना अनुदान मिळालेले नाही. जिल्ह्यातील तब्बल १ हजार ३०० लाभार्थी प्रत्येकी १२ हजार रुपयांच्या अनुदानापासून वंचित आहेत.

या १३०० प्रकरणातील ग्रामसेवकांना निलंबित करण्याची सूचना सीईओ दिलीप स्वामी यांनी केली आहे. सोमवारपर्यंत (ता.१०) मुदत द्या, आम्ही काम पूर्ण करतो अशी विनंती ग्रामसेवकांनी केल्यानंतर कारवाईच्या रडारवरील त्या ग्रामसेवकांना दोन दिवसांची मुदत मिळाली आहे.

जिल्हा परिषदेच्या स्थायी समितीची बैठक आज प्रशासक तथा मुख्य कार्यकारी अधिकारी दिलीप स्वामी यांच्या अध्यक्षतेखाली झाली. या बैठकीत त्यांनी या संदर्भातील आढावा घेतला. या बैठकीला विभागप्रमुख उपस्थित होते. सोलापूर जिल्ह्यातील अनुदानापासून वंचित राहिलेल्या १३०० लाभार्थ्यांमधील ३५० प्रस्ताव हे गटविकास अधिकाऱ्यांच्या पातळीवर प्रलंबित आहेत.

उर्वरित ९५० प्रस्ताव हे ग्रामपंचायत पातळीवर ग्रामसेवकांकडे प्रलंबित आहेत. सीइओ स्वामी म्हणाले, स्वच्छ भारतामध्ये सोलापूर जिल्हा फक्त एवढ्या बाबींमुळे पिछाडीवर आहे. ही कामगिरी वेळेत झाल्यास सोलापूर जिल्ह्याची कामगिरी अव्वल होईल.

या अभियानातील कामाबाबत गटविकास अधिकारी व ग्रामसेवक यांना वेळोवेळी सूचना, प्रबोधन व समुपदेशन करण्यात आले आहे. त्यातून फारसा परिणाम दिसत नसल्याने आता निलंबन आणि वेतनवाढ रोखण्याच्या कारवाईचा निर्णय घेण्यात आला आहे