Sangli Dam News : मान्सूनच्या पावसाने सांगली जिल्ह्यात ओढ दिल्याने जतमध्ये दुष्काळी स्थिती निर्माण झाली आहे. त्यामुळे चांदोली धरणातून २ टीएमसी पाणी म्हैसाळ योजनेतून देण्यास उपमुख्यमंत्री देवेंद्र फडणवीस यांनी मान्यता दिली आहे. या निर्णयामुळे विस्तारीत म्हैसाळ योजनेचा मार्ग मोकळा झाला आहे.

धरणातून हे पाणी येत्या काही दिवसात म्हैसाळ योजनेतून सोडण्यात येणार असून दोन महिन्यात या पाण्याचा वापर करायचा आहे.

जतमधील अनेक गावांमध्ये पाण्याची तीव्र टंचाई निर्माण झाली असून पिण्याच्या पाण्यासाठी टँकर सुरू करावे लागत आहेत. तसेच जनावराच्या चारा-पाण्याचा प्रश्‍नही गंभीर बनत चालला आहे. अशा स्थितीत लोकांना दिलासा देण्याची गरज निर्माण झाली आहे. पण कोयना व चांदोली धरणाच्या पाणलोट क्षेत्रामध्ये व मुक्त पाणलोट क्षेत्रामध्ये पर्जन्यमान कमी असल्याने नदीमध्ये पुरेशा प्रमाणात पाणी नाही. अशा स्थितीमध्ये अधिक काळ सिंचन योजना चालू करता येत नाहीत.

सध्या वारणा नदीवरील चांदोली धरणामध्ये उपयुक्त पाणीसाठा फक्त ७ टीएमसी असून त्यातील काही पाणी जत सारख्या दुष्काळग्रस्त जत तालुक्यासाठी देण्याचे आदेश जलसंपदा विभागामार्फत कृष्णा खोरे विकास महामंडळास देण्यात आले आहे. चांदोली धरणातील २ टीएमसी पाणी २ महिन्यासाठी टंचाई कालावधीत सोडण्यात येणार आहे, असे खा. पाटील यांनी सांगितले. यावेळी आ. विक्रमसिंह सावंत, जिल्हा बँकेचे संचालक प्रकाश जमदाडे, माजी सभापती दिग्विजय चव्हाण आदी उपस्थित होते.