Nar Par Project : ‘नार-पार’च्या पाण्याची गिरणा पट्ट्याला आस

Jalgaon News : भडगाव, जि.जळगाव : नार-पार गिरणा नद्याजोड प्रकल्पासाठी साधारणत: साडेसहा ते सात हजार कोटींचा खर्च अपेक्षित आहे. त्यातून ११ टीएमसी पाणी उपलब्ध होऊन अडीच लाख हेक्टर सिंचन क्षेत्र वाढणार आहे. त्यामुळे गिरणा पट्टा सुजलाम् सुफलाम् होऊन सिंचनात आबादानी होणार आहे. त्यासाठी पाठपुरावा व राजकीय स्तरावरून गतीने कार्यवाही अपेक्षित आहे. 

आंतरराज्यीय दमणगंगा-पिंजाळ नदीजोड प्रकल्प व राज्यांतर्गत नार-पार गिरणा, दमणगंगा-वैतरणा गोदावरी व दमणगंगा एकदरे गोदावरी हे राष्ट्रीय प्रकल्प म्हणून न घेता राज्याच्या निधीतून त्वरित हाती देण्यास राज्य शासनाने तत्त्वत: मान्यता दिली आहे. त्यामुळे पन्नास वर्षांपासून प्रलंबित प्रश्नांना चालना मिळण्याची आशा निर्माण झाली आहे. विशेषत: गिरणा पट्ट्यातील शेतकऱ्यांच्या आशा पल्लवित झाल्या आहेत. 

नार-पार या नाशिक जिल्ह्यातील पेठ, सुरगाणा तालुक्यांतील नद्यांचे वाया जाणारे पाणी गिरणा नदीत टाकण्याची ही योजना आहे. यासाठी साधारणपणे साडेसहा ते सात हजार कोटींचा खर्च अपेक्षित आहे. यातून नाशिक जिल्ह्यातील कळवण, सटाणा, देवळा, मालेगाव या तालुक्यांना, तर जळगाव जिल्ह्यातील चाळीसगाव, भडगाव, पाचोरा, एरंडोल, धरणगाव, अमळनेर, धरणगाव आदी तालुक्यांतील सिंचनक्षेत्र वाढण्यास मदत होणार आहे. धुळे जिल्ह्यातील काही भागांत याचा लाभ होणार आहे. यामुळे साधारत: अडीच लाख हेक्टर सिंचनक्षेत्र वाढण्यास मदत होणार आहे.