Moong Crop Disease: रिसोडला उन्हाळी मुगावर ‘पिवळ्या मोझॅक’चा प्रादुर्भाव

Washim News: रिसोड तालुक्यात उन्हाळी हंगामात लागवड केलेल्या मुगावर पिवळ्या मोझॅक रोगाचा प्रादुर्भाव झाल्यामुळे मुगाचे पीक संकटात सापडले आहे. या रोगाचा प्रादुर्भाव वाढत असल्यामुळे शेतकरी चिंतेत आहेत. उत्पादनात मोठ्या प्रमाणात घट होण्याची शक्यता निर्माण झाली आहे.

मागील काही वर्षांपासून सिंचनाच्या सुविधेत वाढ झाल्यामुळे तसेच या पिकावर शेतकऱ्यांचा अधिक भर असल्यामुळे उन्हाळी हंगामात मुगाची लागवड वाढली आहे. हे पीक दोन ते अडीच महिन्यांच्या कालावधीत तयार होते.

पाण्याची सुविधा असलेल्या शेतकऱ्यांनी तालुक्यात मोठ्या प्रमाणात उन्हाळी उडीद व मूग पिकाची लागवड केली आहे. दरवर्षीच्या अनुभवावरून एकरी चार ते पाच क्विंटलपर्यंत या पिकाचे उत्पादन मिळते.

परंतु या वर्षी उन्हाळी मुगावर पिवळ्या मोझॅकचा मोठ्या प्रमाणात प्रादुर्भाव झाला आहे. एकूण क्षेत्रातील जवळपास ७० ते ८० टक्के झाडांची पाने पिवळी पडली आहेत. महागड्या कीटकनाशकांची फवारणी करूनही काही परिणाम न झाल्यामुळे शेतकऱ्यांना मोठा आर्थिक फटका बसणार आहे.

प्रादुर्भाव झालेली झाडे उपटून शेताबाहेर टाकण्याचा सल्ला कृषी विभागाने दिला आहे. परंतु ७० ते ८० टक्के झाडांवर प्रादुर्भाव झाल्यामुळे हे शक्य नसल्याचे शेतकऱ्यांचे म्हणणे आहे.