Yellow Alert Nanded : नांदेडला दोन दिवस येलो अलर्ट जारी

Nanded News : प्रादेशिक हवामानशास्त्र केंद्र मुंबई यांनी दिलेल्या सूचनेनुसार नांदेड जिल्ह्यासाठी ता. १३ व ता. १४ एप्रिल या दोन दिवशी येलो अलर्ट जारी केलेला आहे. या दोन दिवसांच्या काळात जिल्ह्यात तुरळक ठिकाणी ताशी ३० ते ४० किमी वेगाने वादळी वारे वाहण्याची, विजेच्या कडकडाटासह व ढगाच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे.

या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी, असे आवाहन जिल्हा प्रशासनाने केले आहे. नांदेड जिल्ह्यात एप्रिल महिना सुरु झाल्यानंतर अवकाळी पावसाने हजेरी लावली आहे. यापूर्वी दोनवेळा जिल्ह्यात तुरळक ठिकाणी अवकाळी पावसाने हजेरी लावून फळपिकांचे नुकसान केले होते. यानंतरही जिल्ह्यात रविवारी आणि सोमवारी भारतीय हवामान विभागाने येलो अलर्ट जारी केला आहे.

या काळात विजेच्या गडगडाटासह पावसाची पूर्वकल्पना असल्यास बाहेर जाणे टाळावे, जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसावे, आकाशात विजा चमकत असल्यास घरात किंवा सुरक्षित इमारतीत आश्रय घ्या.

घराच्या बाल्कनी, छत अथवा घराबाहेरील ओट्यावर थांबू नये, आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करावे, तारांचे कुंपण, विजेचे खांब व इतर लोखंडी वस्तूंपासून दूर रहावे, पाण्यात उभे असाल तर तत्काळ पाण्यातून बाहेर पडावे, आकाशात विजा चमकत असल्यास घरातील लँडलाईन फोनचा वापर करू नये, शॉवरखाली अंघोळ करू नये, घरातील बेसिनचे नळ, पाण्याची पाइप लाइन यांना स्पर्श करू नये.

तसेच कुठल्याही विद्युत उपकरणांचा वापर टाळावा, विजेच्या गडगडाटासह वादळी वारे चालू असताना लोखंडी धातूच्या साहाय्याने उभारलेल्या तंबूमध्ये किंवा शेडमध्ये आसरा घेऊ नये, उंच झाडाच्या खाली आसरा घेऊ नका. धातूंच्या उंच मनोर्‍याजवळ उभे टाकू नका. आपण जर घरात असाल तर उघड्या दारातून अथवा खिडकीतून वीज पडताना पाहू नये, हे बाहेर थांबण्याइतकेच धोकादायक आहे, असेही आवाहन निवासी उपजिल्हाधिकारी महेश वडदकर यांनी केले आहे.