Niphad Sugar Factory: ‘निसाका’ विक्रीला सभासद, कामगारांचा विरोध

Nashik News: निफाड तालुक्याचे सहकार क्षेत्रातील वैभव असलेल्या निफाड सहकारी साखर कारखान्याच्या विक्रीची प्रक्रिया नाशिक जिल्हा मध्यवर्ती सहकारी बँक तसेच कारखाना प्रशासनाकडून सुरू असल्याची चर्चा पुढे आली आहे. या मुद्द्यावर सभासद व कामगारांकडून तीव्र प्रतिक्रिया उमटत असून या प्रक्रियेला विरोध वाढत आहे. 

कारखाना विक्रीच्या मुद्द्यावर यापूर्वी बुधवारी (ता. ३०) उपविभागीय अधिकाऱ्यांना पिंपळस ग्रामस्थांनी निवेदन दिले होते. त्यानंतर करंजगावचे माजी सरपंच खंडू बोडके पाटील यांच्यासह कामगार शिष्टमंडळाने जिल्हा बँकेत धडक देत प्रशासक संतोष बिडवई यांना निसाका विक्रीबाबत सवाल उपस्थित केले. 

या वेळी बैठकीस सभासद प्रतिनिधी खंडू बोडके पाटील, निसाका कामगार संघटनेचे सरचिटणीस बी. जी. पाटील, कार्याध्यक्ष प्रमोद गडाख, पिंपळसचे माजी सरपंच तानाजी पुरकर, नितीन निकम, युनियनचे उपाध्यक्ष सुभाष झोमन, खजिनदार बाळासाहेब बागस्कर, चिटणीस नवनाथ गायकवाड, उत्तम गायकवाड, पंढरीनाथ उगले, राजेंद्र गायकवाड, किरण वाघ, सभासद निवृत्ती मत्सागर, चंद्रभान आहेर, अक्रम पठाण, योगेश आढाव आदी उपस्थित होते.

२०१७ पासून सरफेसी ॲक्टनुसार जिल्हा बँकेकडे निसाकाचे सर्वाधिकार आहेत. जिल्हा बँकेने बी. टी. कडलग कंपनीला निसाका भाडेकराराने चालविण्यास दिला. मात्र तीन हंगाम उलटूनही त्यांनी कारखाना सुरू न करता उलट राजकीय आश्रयाने त्यातील कोट्यवधीची सामुग्री विक्री केल्याचा आरोप बोडके पाटील यांनी बैठकीत केला.

कामगार संघटनेचे कार्याध्यक्ष प्रमोद गडाख, सरचिटणीस बी. जी. पाटील यांनीही कारखाना विक्रीस कामगारांचा विरोध असल्याचे सांगत सुमारे ८१ कोटी रुपये कामगारांची देणी कोण देणार, असा प्रश्न प्रशासक बिडवई यांना विचारला. 

राजकीय जोडे बाजूला ठेवून जनआंदोलन उभारणार 

निसाका विक्रीचा घाट जिल्हा बँकेने घातला असून उपमुख्यमंत्री एकनाथ शिंदे यांच्या राजाश्रयाने बी. टी. कडलग कंपनी व माजी खासदार हेमंत गोडसे यांनी निसाका भाडेकराराने घेऊन तो चालू न करता निफाडकरांची फसवणूक केली आहे.

तालुक्यातील सर्वपक्षीय सभासद व कामगारांनी राजकीय जोडे बाजूला ठेवून एकत्र येऊन जनआंदोलन उभारून कारखाना गिळंकृत करण्याचा डाव हाणून पाडावा, असे आवाहन करत प्रसंगी उच्च न्यायालयात धाव घेण्याचा इशारा खंडू बोडके पाटील यांनी दिला आहे.