Climate Change : हवामान बदलासंदर्भात श्रीमंत देश खिशात हात घालणार?

Global Warming : येथील संयुक्त राष्ट्रांची हवामानबदलविषयक परिषद अखेरच्या टप्प्यात आली असताना वैश्विक तापमानवाढ रोखण्यासाठी श्रीमंत देशांनी विकसनशील देशांना नेमकी किती आर्थिक मदत करावी याबाबतचा आराखडा अद्याप निश्चित होऊ शकलेला नाही. चर्चेच्या पातळीवर देखील उदासीनता दिसू लागल्याने पर्यावरणविषयक हक्कांसाठी लढणाऱ्या संघटनांनी नाराजी व्यक्त केली आहे. आता या संघटना संमेलनस्थळाच्या बाहेरच मोठे आंदोलन करण्याच्या विचारात आहेत.

श्रीमंत देश पर्यावरण संरक्षणासाठी स्वतःच्या खिशात हात घालणार का, असा सवाल विचारला जात आहे. हवामान बदलांचा सर्वांत मोठा फटका गरीब आणि विकसनशील देशांना बसत असून कोणत्याही परिस्थितीमध्ये आम्हाला आर्थिक मदत देण्यात यावी अशी मागणी त्यांच्याकडून करण्यात येत आहे.

गरीब देशांना भरपाई द्यायची झाल्यास त्यांना वर्षाकाठी १ ट्रिलियन डॉलरपेक्षा अधिक निधी द्यावा लागेल. याशिवाय ते पूर्णपणे स्वच्छ ऊर्जेच्या वापराकडे वळावेत म्हणून देखील भरीव मदत द्यावी लागेल. ही मदत देण्यासाठी श्रीमंत देश खरोखरच खिशात हात घालणार का? याकडे जगाचे लक्ष लागले आहे.

या संमेलनामध्ये आतापर्यंत झालेल्या चर्चेवर पर्यावरणविषयक संघटनांनी तीव्र नाराजी व्यक्त केली असून चर्चेच्या पातळीवरून हा मुद्दा अंमलबजावणीच्या पातळीवर यायला हवा अशी अपेक्षा त्यांच्याकडून व्यक्त केली जात आहे. येत्या तीन ते चार दिवसांमध्ये ठोस काहीतरी निष्कर्ष समोर येऊ शकतो अपेक्षा व्यक्त होते आहे.

या संमेलनावर जीवाश्म इंधन लॉबीचा मोठा प्रभाव दिसून येत असल्याने अमेरिकेचे माजी उपाध्यक्ष आणि पर्यावरण अभ्यासक अल गोर यांनी तीव्र शब्दांत नाराजी व्यक्त केली आहे. जीवाश्म इंधन लॉबीचे जवळपास दीड हजारांपेक्षाही अधिक प्रतिनिधी या संमेलनामध्ये सहभागी झाल्याने पर्यावरण संघटनांची चिंता आणखी वाढली आहे.

‘जी-२०’ मध्येही मंथन होणार

हवामान बदलाच्या अनुषंगाने जी- २० देशांसाठी आता काही तरी ठोस पावले उचलावी लागतील असे संयुक्त राष्ट्राचे हवामानबदल विषयक विभागाचे प्रमुख सिमॉन स्टेईल यांनी म्हटले आहे. जी मंडळी रिओतील चर्चेत सहभागी झाली होती त्यांनी कार्बन उत्सर्जन रोखण्यासाठी आता ठोस कृती करणे गरजेचे असल्याची अपेक्षा त्यांनी व्यक्त केली आहे.

जी-२० देशांच्या संमेलनाला सोमवारपासून सुरुवात होते आहे. सोमवार (१८) आणि मंगळवार (१९) असे दोन दिवस हे संमेलन होणार असून, त्याला पंतप्रधान नरेंद्र मोदी, चीनचे अध्यक्ष शी जिनपिंग आणि अमेरिकेचे अध्यक्ष ज्यो बायडेन हे उपस्थित राहणार आहेत. या संमेलनामध्ये जागतिक तापमानवाढ हाच मुद्दा चर्चेच्या केंद्रस्थानी असेल असे सांगण्यात आले आहे.