Wild Boar Crop Damage : रानडुकरांकडून मक्याचा फडशा

Nashik News : नांदिन (ता. बागलाण) येथील शेतकरी अनिल पोपट देवरे यांच्या दोन एकरातील मक्याचे रानडुकरांनी नुकसान केले असून, संपूर्ण पिकाचे खोड कुरतडल्याने आणि ताटे आडवे केल्याने संतप्त शेतकऱ्याने या पिकावर रोटावेटर फिरविला आहे.

या भागात रानडुकरांनी उच्छाद मांडला असून, याबाबत वन विभागला वेळोवेळी कळवूनही त्याकडे दुर्लक्ष झाल्याने शेतकऱ्याने नाराजी व्यक्त केली. या नुकसानीचा पंचनामा करून भरपाई मिळावी, अशी मागणी केली आहे.

वनविभागाच्या पिसोळ हद्दीनजीक अनिल देवरे यांच्या गट क्रमांक १८३ मधील सुमारे दोन एकर क्षेत्रातील मक्याचे नुकसान झाले आहे. श्री. देवरे यांनी पेरणीसाठी हात उसनवारी घेऊन लागवड केली. बियाणे, खते, औषधे मोठा आर्थिक खर्च केला होता. योग्य वेळी पाऊस पडल्यामुळे पीक जोमात आले होते.

चांगल्या उत्पन्नाची आशा निर्माण झाली होती. मात्र, अन्नाच्या शोधात आलेल्या रानडुकरांनी रात्रीच्या वेळी शेतात धुडगूस घालून संपूर्ण मका पीक आडवे केले आहे. सर्वच खोड कुरतल्याने अनेक ताटे आपोआप नष्ट झाले आहेत. तर उर्वरित आडवे झाल्याने त्यापिकाचा काहीच उपयोग होणार नसल्याने निदान दुसरे काही घेता येईल यासाठी त्यांनी रोटावेटर फिरविला आहे.

सध्या नांदिन परिसरात रानडुकरांच्या त्रासाने शेतकरी हैराण झाले आहेत. डोंगराळ भागातील वन्यप्राणी अन्नाच्या शोधात माणसांच्या वस्तीकडे येत आहेत. रानडुकरे उभ्या पिकांमध्ये घुसून त्यांचे मोठे नुकसान करत आहेत. त्यामुळे शेतकऱ्यांचे आर्थिक संकट वाढत चालले आहे.

शेतकऱ्यांनी वारंवार तोंडी तक्रारी करूनसुद्धा वनविभागाच्या कर्मचाऱ्यांकडून कोणतीही ठोस उपाययोजना करण्यात आलेली नाही. संरक्षणासाठी ना तात्पुरते कुंपण, ना शॉक मशिन, ना गस्त काहीच उपाय नाहीत.

त्यामुळे संतप्त अनिल देवरे यांनी स्वतःच्या शेतातील उध्वस्त मक्यावर रोटा फिरवून नांगरणी केली. ''जेव्हा शासन आणि प्रशासन मदतीसाठी पुढे येत नाही, तेव्हा आपल्या हातात काहीच राहत नाही अशी उद्वेगजनक प्रतिक्रिया त्यांनी व्यक्त केली आहे.