Jalgaon News : शेतीमालाच्या दरांवरील दबाव, चढउतार ही समस्या काहीशी रोखण्यासाठी लाभदायी ठरणारा शेतकरी बाजार जळगाव व अन्य मोठ्या शहरांत सुरू करण्यासंबंधी चालढकल सुरू आहे. अनेकदा शेतकरी बाजारचा मुद्दा समोर येतो. पण नंतर हा मुद्दा मागे पडतो. प्रशासन, लोकप्रतिनिधींची अनास्था यामुळे हा मुद्दा प्रलंबितच आहे.
शेतमालाचे दर कमी झाल्यास शेतकऱ्यांना फटका बसतो. अनेकदा ही समस्या असते. खरिपात उडीद, मूग, सोयाबीन, मका आदींची आवक वाढल्यानंतर दरांवर दबाव वाढतो. रब्बीतही अशीच स्थिती असते. भाजीपाल्याबाबतही असाच प्रकार असतो. शेतकरी नुकसान सहन करतात.
अनेक शेतकरी शहरात थेट ग्राहकांना शेतमाल विक्रीचा प्रयत्न करतात. पण त्यासाठी चांगले व्यासपीठ, हक्काची जागा शेतकऱ्यांकडे नाही. त्यावर शेतकरी बाजार लाभदायी ठरू शकतो. जळगाव जिल्ह्यात जळगाव, भुसावळ, यावल, रावेर, चोपडा, पाचोरा, चाळीसगाव, अमळनेर येथे शेतकरी बाजार सुरू करण्याचा मुद्दा अनेकदा समोर आला आहे.
ही बाब लक्षात घेता विकेल ते पिकेल संकल्पनेतून धान्य विक्रीसाठी शेतकऱ्यांना शहरांमध्ये जागा, स्टॉल उपलब्ध करून देण्याची मागणी केली जात होती. यामुळे शेतमालासही दर टिकून राहतील व ग्राहकांचा लाभ होईल, असा मुद्दा उपस्थित केला जात आहे. शेतकरी बाजारातून दादर ज्वारी, भरीताची वांगी यांची विक्री करण्यास प्रोत्साहन देण्याचा प्रयत्न मध्यंतरी झाला. या अंतर्गत जळगाव, भुसावळात स्टॉलही सुरू झाले होते.
परंतु खरिपात व पुढे रब्बीतील धान्यासह सर्व भाजीपाल्यासाठीही अशी संकल्पना, उपक्रम असावा, असा मुद्दा शेतकरी उपस्थित करीत आहेत. अनेकदा काढणी सुरू झाल्यानंतर दर कमी असतात. थेट ग्राहकांना हे धान्य दिल्यास चांगला लाभ यात होईल. परंतु ग्राहकांपर्यंत ते व्यवस्थितपणे पोचण्याची यंत्रणा, व्यवस्था नाही. ही बाब लक्षात घेता शेतकरी बाजारांना शहरांत वाढविण्याची , प्रोत्साहन देण्याची गरज आहे.
पालिका व कृषी विभागाकडून हवा पुढाकार
चाळीसगाव, भुसावळ, चोपडा, रावेर, यावल, मुक्ताईनगर, जामनेर, पाचोरा, अमळनेर, पारोळा, धुळ्यातील धुळे, शिरपूर, नंदुरबारातील शहादा, तळोदा, नंदुरबार, नवापूर या भागात शेतकरी बाजार सुरू केल्यास शेतमाल विक्रीसंबंधी शेतकऱ्यांना हक्काची जागा उपलब्ध होईल.
तसेच ग्राहकांना दर्जेदार शेतमाल रास्त दरात उपलब्ध होईल, असा मुद्दा शेतकरी उपस्थित करीत आहेत. याबाबत कृषी विभागाने चर्चा करावी व पुढील कार्यवाही करावी, अशी मागणीदेखील शेतकरी करीत आहेत.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.