Maharashtra Drought Condition : दुष्काळाची दाहकता! महाराष्ट्रातील ४२२ गावांमध्ये ४५० टँकरद्वारे पाणीपुरवठा

Drought Condition Maharashtra : कोकण आणि विदर्भवगळता पश्चिम महाराष्ट्र, उत्तर महाराष्ट्र आणि मराठवाड्यात टँकर सुरू झाले आहेत. राज्यात जवळपास ४२२ गावांमध्ये ४५० टँकर सुरू झाले आहेत. यामध्ये दर आठवड्याला टँकरच्या संख्येत वाढ होत असून, यापुढच्या काळात टँकरची मागणी वाढण्याची शक्यता आहे. राज्यातील धरणांचा पाणीसाठा ६२ टक्क्यांवर पोहोचला आहे.

मराठवाड्याला पाणीपुरवठा करणाऱ्या सर्व धरणांमध्ये केवळ ३६.४९ टक्के पाणीसाठा शिल्लक आहे. राज्यात मागच्या वर्षी डिसेंबर अखेरीस एकही पाण्याचा टँकर सुरू नव्हता. शिवाय पाण्याचा साठाही ८३ टक्क्यांच्या पर्यंत होता. यंदा मात्र पाणीटंचाईचे संकट असल्याचे दिसत आहे.

धरणांतील पाणीसाठा खालावतोय

राज्याला पाणीपुरवठा करणाऱ्या लहानमोठ्या सर्व २ हजार १९४ धरणांमध्ये ६२.७९ टक्के पाणीसाठा शिल्लक आहे. त्यामध्ये छत्रपती संभाजीनगर विभागात ३६,४९ टक्के, पुणे विभागातील धरणांमध्ये ६५.९१ टक्के, नाशिक विभागातील धरणांत ६६.५२ टक्के तर नागपूर विभागातील धरणांत ६८.२९ टक्के पाणीसाठा शिल्लक आहे.

उजनीत उपयुक्त पाणीसाठा १७ टक्क्यांपर्यंत

गेल्या तीन महिन्यांत पाण्याचा वापर वाढल्याने शेतकऱ्यांची चिंता वाढली आहे. विशेष म्हणजे सध्या उजनी धरणातील उपयुक्त पाणीसाठा अवघा १७ टक्क्यांपर्यंत खाली आला आहे. तर ९.४८ टीएमसी एवढा पाणीसाठा शिल्लक आहे. त्यामुळे आगामी काळात इंदापूर, सोलापूर भागांतील शेतीच्या पाण्याचा गंभीर प्रश्‍न उभा राहणार असल्याचे चित्र आहे.

सध्या मुठा खोऱ्यातील धरणांत २२.१९ टीएमसी म्हणजेच ७६ टक्के पाणीसाठा आहे. तर नीरा खोऱ्यातील धरणांत ३४.६० टीएमसी म्हणजेच ७१ टक्के पाणीसाठा आहे. कुकडी खोऱ्यातील धरणांत २८.६२ टीएमसी म्हणजेच ८० टक्के पाणीसाठा उपलब्ध आहे.