Water Scarcity : राज्यात पाणी टंचाई गंभीर वळणावर

Pune News : पावसाळ्यात अनेक भागांमध्ये समाधानकारक पाऊस झालेला नाही. त्याचे डिसेंबरपासून परिणाम जाणवण्यास सुरुवात झाली आहे. नाशिक, सातारा, सांगली, छत्रपती संभाजीनगर आणि जालना या जिल्ह्यांत पाणीटंचाईची समस्या वाढत आहे.

जानेवारीच्या अखेरीस टंचाई गंभीर वळणावर येऊन ठेपली आहे. राज्यात तब्बल ४५६ गावे व १०८७ वाड्या वस्त्यांवर ५११ टँकरने पाणी पुरवठा केला जात आहे. येत्या काळात पाणी टंचाईच्या झळा आणखी तीव्र होण्याची शक्यता व्यक्त करण्यात येत आहे.

पावसाळ्यात लांबलेल्या पावसामुळे त्याचा परिणाम शेतीसह पिण्याचा पाण्यावर सुद्धा झाला आहे. जुलै अखेरीस तसेच ऑगस्ट महिन्याच्या पहिल्या आठवड्यात झालेल्या पावसामुळे धरणे जेमतेम भरली. त्यानंतर सप्टेंबरमध्ये खंड पडला असून सप्टेंबरच्या अखेरीस काही प्रमाणात पाऊस पडला होता. त्यामुळे पाणीपातळी वाढली नसल्याने अनेक गावांना ऐन पावसाळ्यात पाणीटंचाईचा सामना करण्याची वेळ आली होती. त्यानंतर जानेवारी अखेरीस १३ जिल्ह्यांत पाणी टंचाई सुरू झाली आहे.

यंदा सहा नोव्हेंबरच्या दरम्यान काही प्रमाणात टँकरची संख्या कमी झाली होती. साधारणपणे या कालावधी टँकरची संख्या ३२२ पर्यंत खाली आली होती. त्यानंतर टँकरच्या संख्येत वाढ होत गेली. १३ नोव्हेंबरच्या दरम्यान ३१६ गावे व ९३९ वाड्या रस्त्यांवर ३२७ टँकरने पाणीपुरवठा करण्यात येत होता.

त्यानंतर टँकरच्या संख्येत झपाट्याने वाढ होऊन २६ डिसेंबरच्या दरम्यान ४२२ गावे व ९९७ वाड्या वस्त्यांवर तब्बल ४५० टँकरने पाणीपुरवठा सुरू होता. जानेवारी महिन्यात पाणीटंचाई आणखी तीव्र झाली आहे. त्यामुळे टँकरच्या संख्येत तब्बल ६१ ने वाढ होऊन ती ५११ टॅंकरपर्यंत पोहोचली आहे.

गेल्यावर्षी ३० जानेवारीच्या दरम्यान अवघे ३ वाड्यावस्त्यांवर दोन टँकरने पाणीपुरवठा सुरू होता. गेल्या वर्षीच्या तुलनेत चालू वर्षीचा विचार केल्यास टँकरची संख्या अधिक आहे. यंदा नाशिक जिल्ह्यात काहीसा कमी पाऊस पडल्याचे चित्र आहे. त्यामुळे येथे टँकरची संख्या डिसेंबर महिन्यापासून वाढल्याचे दिसून येते. जळगाव, नगर जिल्ह्यात टंचाईची तीव्रता कमी आहे. पुणे विभागातील सातारा, सांगली कमी पावसामुळे संख्या वाढली आहे. साताऱ्यामध्ये ८० टँकर, तर सांगलीत ४३ टँकरने पाणी पुरवठा सुरू आहे.

छत्रपती संभाजीनगर, जालन्यात टँकर वाढले

पावसाळ्यात मराठवाड्यातील छत्रपती संभाजीनगर, जालना जिल्ह्यांत पावसाचे प्रमाण काहीसे कमी होते. त्यामुळे भूजल पातळी फारशी वाढलेली नाही. जानेवारी महिन्यात छत्रपती संभाजीनगर जिल्ह्यातील ९७ गावे व १३ वाड्यावस्त्यांवर १०५ टँकरने पाणी पुरवठा सुरू आहे. जालना जिल्ह्यातील ५८ गावे व २५ वाड्यावस्त्यांवर सर्वाधिक ११० टँकरने पाणीपुरवठा सुरू आहे. त्यामुळे येत्या काळात या दोन्ही जिल्ह्यांना भीषण पाणी टंचाई भेडसावण्याची शक्यता आहे.

मागील सात वर्षांतील जानेवारीअखेरीस गावनिहाय सुरू टँकरची संख्या :

वर्ष --- गावे --- वाड्या वस्त्या -- टॅंकर संख्या

२०२३ --- ० -- ३ -- ३

२०२२ -- ३-- १ -- २

२०२१ -- ० -- ० -- ०

२०२० -- १ -- ० -- १

२०१९ -- १५७६-- ३४४२ -- १८९१

२०१८ -- २०४ -- ० -- १५९

२०१७ -- २४ -- २३ --- ६४

जिल्हानिहाय टँकरची संख्या

जिल्हा -- गावे --- वाड्या वस्त्या -- टँकर संख्या

पालघर --- १ --- ३ --- २

नाशिक --- १२८ -- २५५ -- १२३

धुळे --- १ -- ० --- १

जळगाव --- १५ -- ० -- १६

नगर --- १५ -- ६३ -- १२

पुणे --- १० -- ६१ -- १२

सातारा --- ८० -- २९१ -- ८०

सांगली --- ४४ -- ३३८ -- ४३

सोलापूर -- ४ -- ३५ -- ४

छत्रपती संभाजीनगर -- ९७ -- १३ -- १०५

जालना -- ५८ -- २५ -- ११०

बीड -- १ -- ३ -- १

बुलडाणा -- २ --० -- २