Melghat Drought : मेळघाटातील जलसंकट अधिक गडद

Water crisis in Melghat : मेळघाटामधील चिखलदरा तालुक्यात जलसंकट अधिक गडद झाले आहे. मागील आठवड्यात सात-आठ टॅंकरद्वारे पाणीपुरवठा होत होता. मात्र आता या आठवड्यापासून ११ गावांना २० टॅंकरद्वारे पाणीपुरवठा करण्याची वेळ आली आहे. दरवर्षी जिल्हा प्रशासनाकडून मेळघाटातील पाणीटंचाई निवारण्यासाठी कोट्यवधी रुपये खर्च केले जातात, मात्र हा सर्व पैसा आता पाण्यात गेल्याचे चित्र दिसून येत आहे.

चिखलदरा तालुक्यातील खडीमल या गावातील परिस्थिती भीषण आहे. या गावाला दररोज चार टॅंकरद्वारे पाणीपुरवठा केला जातो. तरीसुद्धा गावातील विहिरीवर पाणी भरण्यासाठी महिलांची गर्दी होत आहे. याच पद्धतीने अन्य काही गावांमध्ये सुद्धा एक ते दीड किलोमीटर अंतरावरून नागरिकांना व महिलांना पाणी आणावे लागत आहे.

मागील वर्षी सरासरीपेक्षा कमी पाऊस झाल्याने यंदा विहिरींचा जलस्तर मार्चमध्येच घटला आहे. त्यामुळे मार्चपासूनच चिखलदरा तालुक्यात टॅंकरद्वारे पाणीपुरवठा केला जात आहे. खडीमल गावात दररोज चार टॅंकरने पाणीपुरवठा होत आहे. दोन दिवसांपूर्वी अवकाळी पाऊस आणि वादळी वाऱ्यामुळे येथील वीजपुरवठा खंडित झाल्याने टॅंकरमध्ये पाणी भरण्यासाठी अडथळे येत होते. मात्र मंगळवारपासून येथील परिस्थिती सामान्य झाली. परंतु दोन दिवस मात्र नागरिकांना उन्हातान्हात पाण्यासाठी वणवण भटकंती करावी लागली. चिखलदरा तालुक्यातील अन्य गावांमध्ये सुद्धा टंचाईची स्थिती आहे.

टॅंकरची उपलब्धता

चिखलदरा पंचायत समितीअंतर्गत ११ गावांना टॅंकरद्वारे पाणीपुरवठा होत आहे. खडीमल गावाला चार टॅंकर देण्यात आले आहे. याशिवाय नुकतेच खिरपाणी या गावातसुद्धा टॅंकरद्वारे पुरवठा होत आहे. प्रस्ताव आल्याबरोबर त्या गावांना टॅंकर उपलब्ध करून दिले जातात, असे चिखलदरा पंचायत समितीचे आरेखक आदित्य तारू यांनी सांगितले.

या गावांत टॅंकर सुरू

आकी, खडीमल, मोथा, लवादा, तारुबांधा, गौलखेडा बाजार, महेरियम, बहादरपूर, गवलीढाणा, आलाडोह, खिरपाणी.