Melghat Drought : उन्हाच्या झळा तीव्र, मेळघाटात २० टँकरने पाणीपुरवठा

Melghat Water Crisis : मे महिना सुरू होताच उन्हाची तीव्रतासुद्धा मोठ्या प्रमाणात वाढली आहे. मेळघाटातील चिखलदरा तालुक्यातसुद्धा हीच परिस्थिती असून, गावकऱ्यांची तहान भागविण्यासाठी २० टॅंकर सुरू झाले आहेत. विशेष म्हणजे, दोन दिवसांनी खिरपाणी या गावाला सुद्धा टॅंकर लागणार असल्याने टॅंकरच्या संख्येत वाढ होणार आहे.

यंदा सुरुवातीपासूनच भीषण पाणीटंचाईचे संकेत मिळाले होते. मार्च महिन्याच्या अखेरीस चिखलदरा तालुक्यातील काही गावांना टँकर सुरू करण्यात आले. त्याची तीव्रता वाढत गेल्याने आता मेमध्ये टँकरची संख्या २० पर्यंत गेली आहे. आलाडोहला दोनच दिवसांपूर्वी टँकर सुरू झाला असून, आणखी दोन दिवसांनी खिरपाणी या गावाला टँकरद्वारे पाणीपुरवठा केला जाणार आहे.

जिल्हाधिकारी तसेच जिल्हा परिषदेच्या मुख्य कार्यकारी अधिकाऱ्यांकडून टंचाईवर बारीक लक्ष ठेवण्यात येत आहे. चार दिवसांपूर्वीच पाणीटंचाईच्या विषयावर जिल्हाधिकाऱ्यांकडून बैठकीचे नियोजन करण्यात आले होते. या बैठकीत संबंधितांना सूचनादेखील करण्यात आल्या, मात्र टंचाई निर्मूलनाच्या कामात अडथळा असलेल्या जलजीवन मिशनमधील निकृष्ट कामांचा मुद्दा कुठेच चर्चेला आला नाही.

...या गावांना लागले टँकर

आकी, खडीमल, मोथा, लवादा, तारुबंधा, गौलखेडा बाजार, महेरियम, बहाद्दरपूर, गवळीढाणा, आलाडोह, सावंगी मग्रापूर, खिरपाणी.

खासगी विहिरींचे अधिग्रहण

वाढत्या टँकर संख्येसोबतच अधिग्रहित करण्यात आलेल्या खासगी विहिरींची संख्या सुद्धा वाढली आहे. सद्यःस्थितीत चिखलदरा तालुक्यात १९ विहिरींचे अधिग्रहण करण्यात आले असून त्यापैकी १० विहिरींचा वापर टँकरकरिता तर नऊचा उपयोग ग्रामस्थांची तहान भागविण्यासाठी केला जात आहे. विहिरींचे अधिग्रहण सुद्धा वाढण्याचे संकेत आहेत.