MGNREGA Wages : रोजगार हमी योजनेचे मजुरीदर आता २९७ रुपये

Pune News : महात्मा गांधी राष्ट्रीय रोजगार हमी योजनेत महाराष्ट्रात यापुढे प्रतिदिन २९७ रुपये मजुरीदर देण्यास केंद्र सरकारने मान्यता दिली आहे. यामुळे फळबागांवरील कामांसाठी शेतकऱ्यांना गेल्या वर्षीच्या तुलनेत प्रतिदिन २४ रुपये जास्त मिळणार आहेत.

केंद्रीय ग्रामीण विकास मंत्रालयाने बुधवारी (ता. २७) अधिसूचना काढून देशातील नवे मजुरीदर घोषित केले. रोजगार हमीवर कामाच्या मोबदल्यात मिळणाऱ्या मजुरीचे सर्वांत जास्त दर आता हरियानाचे असून, ते प्रतिदिन ३७४ रुपये असतील. सर्वांत कमी दर पंजाबचे असून ते प्रतिदिन २२२ रुपये आहेत.

नवे दर येत्या एक एप्रिलपासून दिले जातील, असे केंद्रीय ग्रामविकास विभागाचे सहसचिव अमित कटारिया यांनी एका पत्रात स्पष्ट केले आहे. महाराष्ट्राच्या शेजारील राज्यांचा विचार करता ‘रोहयो’चे नवे मजुरीदर गुजरातसाठी २८० रुपये, तर कर्नाटक ३४९ रुपये, मध्य प्रदेश २४३ रुपये, तेलंगणा ३०० रुपये, तसेच गोव्यात प्रतिदिन ३५६ रुपये असतील.

दरम्यान, राज्याचे फलोत्पादन संचालक डॉ. कैलास मोते यांनी सांगितले, की केंद्राच्या निर्णयामुळे रोजगार हमी योजनेच्या अखत्यारीत राज्यात होणाऱ्या नव्या फळबाग लागवडीला चालना मिळणार आहे. एक एप्रिलपासून फळबागांमधील होणाऱ्या सर्व अकुशल कामांचे मजुरीदर प्रतिदिन २४ रुपयांनी वाढवले जातील. सध्या प्रतिदिन २७३ रुपये मजुरीदराने बिले अदा केली जात आहेत.

नवी लागवड ६० हजार हेक्टरपर्यंत शक्य

रोजगार हमी योजनेतून राज्यात होणारी नवी फळबाग लागवड यंदा चांगला पाऊस झाल्यास ६० हजार हेक्टरच्या आसपास राहू शकते. चालू हंगामात लागवड उद्दिष्ट ५५ हजार हेक्टर होते; पावसाने साथ दिल्यास लागवड ६० हजार हेक्टरपर्यंत जाऊ शकते, असा अंदाज फलोत्पादन विभागाचा आहे.