Sugar Factory Election : ‘सहकारमहर्षी’साठी ११ मे, ‘पद्मश्री’साठी ९ मे रोजी मतदान

Ahilyanagar News : आशिया खंडातील पहिला सहकारी साखर कारखाना असलेल्या लोणी (ता. राहाता) येथील पद्मश्री डॉ. विठ्ठलराव विखे पाटील सहकारी साखर कारखान्याच्या संचालक मंडळाच्या पंचवार्षिक निवडणुकीसाठी ९ मे रोजी, तर संगमनेर येथील सहकारमहर्षी भाऊसाहेब थोरात सहकारी साखर कारखाना संचालक मंडळाचा पंचवार्षिक निवडणुकीसाठी ११ मे रोजी मतदान होणार आहे. राज्य सहकारी निवडणूक प्राधिकरणाने निवडणूक कार्यक्रम जाहीर केला आहे.

अहिल्यानगर जिल्ह्यातील पद्मश्री डॉ. विठ्ठलराव विखे व संगमनेर येथील सहकारमहर्षी भाऊसाहेब थोरात सहकारी साखर कारखान्याची पंचवार्षिक निवडणूक होत आहे. लोणी (ता. राहाता) येथील पद्मश्री डॉ. विठ्ठलराव विखे यांनी आशिया खंडातील पहिला सहकारी साखर कारखाना उभा करत सहकाराची मुहूर्तमेढ रोवली.

या कारखान्यावर पालकमंत्री राधाकृष्ण विखे पाटील व माजी खासदार डॉ. सुजय विखे पाटील यांची सत्ता आहे. सहकारमहर्षी थोरात सहकारी साखर कारखान्यावर माजी महसूलमंत्री बाळासाहेब थोरात यांची सत्ता आहे.

जिल्ह्यातील आणि राज्याच्या राजकारणात थोरात, विखे कुटुंबाचे नाव अग्रक्रमाने घेतले जाते. अहिल्यानगर दक्षिण लोकसभा मतदार संघात डॉ. सुजय विखे पाटील यांचा पराभव झाला. त्यानंतर विधानसभा निवडणुकीत संगमनेरमधून बाळासाहेब थोरात यांचा पराभव झाला.

त्यामुळे राजकारणात एकमेकांचे उट्टे काढण्याचा कार्यक्रम सुरू असताना आता लोकसभा व विधानसभा निवडणुकीनंतर पहिल्यांदाच दोन्ही नेत्यांच्या भागात स्थानिक निवडणुका होत आहेत. आतापर्यंत या कारखान्याच्या निवडणुका बहुतांशवेळा बिनविरोध झालेल्या आहेत. मतदान प्रक्रियेला अजून सव्वा महिन्याचा कालावधी आहे.

या वेळी बिघडलेली राजकीय परिस्थिती या साखर कारखान्याचा संचालक मंडळाच्या निवडणुका बिनविरोध होतात, की मतदान प्रक्रियेला सामोरे जावे लागते, याकडे जिल्ह्याचे लक्ष लागलेले आहे. थोरात कारखान्यासाठी संगमनेर उपविभागीय अधिकारी शैलेश हिंगे यांची निवडणूक निर्णय अधिकारी म्हणून, तर तहसीलदार धीरज मांजरे यांची सहायक अधिकारी म्हणून नियुक्ती करण्यात आली आहे. डॉ. विखे कारखान्यासाठी शिर्डी उपविभागीय अधिकारी माणिक आहेर यांची निवडणूक निर्णय अधिकारी म्हणून, तर तहसीलदार अमोल मोरे यांची सहायक अधिकारी म्हणून नियुक्ती करण्यात आली आहे.

डॉ. विखे पाटील, थोरात कारखाना निवडणूक

नामनिर्देशनपत्र दाखल करणे ः ३ एप्रिल ते ९ एप्रिल

छाननी ः ११ एप्रिल रोजी

वैध नामनिर्देशन पत्रांची यादी प्रसिद्धी ः१५ एप्रिल

अर्ज मागे घेणे ः १५ एप्रिल ते २९ एप्रिल

चिन्ह वाटप ः २ मे

डॉ. विखे पाटील साठी मतदान ः ९ मे

निकाल ः १० मे

सहकारमहर्षी थोरात साठी मतदान ः ११ मे

निकाल ः १२ मे