Vasaka Sugar Mill : ‘वसाका’ कारखान्याच्या विक्रीचा घाट

Nashik News : पाच तालुक्यांचे कार्यक्षेत्र असलेल्या विठेवाडी (ता.देवळा) येथील वसंतदादा सहकारी साखर कारखान्याच्या विक्रीची (वसाका) प्रक्रिया अखेर अंतिम टप्प्यात आली आहे. कर्जापोटी राष्ट्रीय सहकार विकास महामंडळ (एनसीडीसी) यांच्या नियंत्रणातील डीआरटी कोर्टाच्या आदेशानुसार येत्या २० ऑगस्ट २०२५ रोजी कारखान्याची ऑनलाइन लिलाव प्रक्रिया पार पडणार आहे.

या संदर्भातील अधिकृत नोटीस वसाका कारखान्याच्या प्रवेशद्वारावर लावण्यात आली आहे. या निर्णयास प्रचंड विरोध असूनही विक्री प्रक्रिया पुढे नेण्यात येत असल्याने कामगार आणि सभासदांमध्ये संतापाची भावना आहे.

एकीकडे सहकाराला आलेली मरगळ दूर करण्यासाठी प्रयत्नाची पराकाष्ठा केली पाहिजे असे म्हणायचे, आणि दुसरीकडे शेकडो एकर जमीन व मालमत्तेवर डोळा ठेवून ती मालमत्ता हळूहळू घशात घालण्याचा कुटील डाव केंद्रीय सहकार विभागाकडून आखला जातो आहे,अशी संतप्त भावना कारखाना कार्यक्षेत्रातील ऊस उत्पादक शेतकरी व कर्मचाऱ्यांची आहे.

एनसीडीसीच्या थकबाकीच्या आधारे विक्रीची प्रक्रिया सुरू करण्यात आली असली तरी प्रत्यक्षात कारखान्यावर सर्वाधिक कर्ज हे इतर राष्ट्रीयीकृत व सहकारी बँकांचे आहे. यामध्ये शिखर बँकेचे सुमारे १२४ कोटी, कारखान्यातील कर्मचाऱ्यांचे थकीत वेतन, प्रॉव्हिडंट फंड व इतर मिळकती मिळून ४१ कोटी, एचडीएफसी बँकेचे ३४ कोटी तसेच इतर बँकांचेही कोट्यवधी रुपयांचे कर्ज प्रलंबित आहे.

अशा स्थितीत केवळ एनसीडीसीच्या थकबाकीच्या आधारे लिलावाची प्रक्रिया राबवली जात असल्याने इतर वित्तीय संस्थांनी आक्षेप नोंदवला आहे का, हा प्रश्न अनुत्तरित आहे. त्यामुळे कारखान्याचा खरेदीदार मिळाला तरी प्रत्यक्ष विक्री होऊ शकेल का, याबाबतही शंका निर्माण झाली आहे.

कारखान्याची एकूण अंदाजे मालमत्ता ४०० कोटी रुपयांच्या पुढे असून, एकूण थकीत देणी ३०० कोटींच्या वर आहे. त्यामुळे विक्री झाली तरी त्या रकमेत सर्व थकबाकी फिटेल का आणि कर्मचाऱ्यांचे हक्क शिल्लक राहतील का, यावर प्रश्नचिन्ह आहे.