Onion Cultivation : वैजापुरात १८ हजार ५०० हेक्टरवर कांदा लागवड

Chh. Sambhajinagar News : गतवर्षीच्या तुलनेत वैजापूर तालुक्यात कांद्याचे क्षेत्र सुमारे दोन हजार हेक्टरपेक्षा जास्त वाढले आहे. कांदा चाळ, बाजारात आवक विषयी सजग शेतकरी, दरातील सातत्य, इतर पिकाच्या तुलनेत कांद्याने काही तरी देऊन जाणे यामुळे तालुक्यात क्षेत्र वाढ झाल्याचे शेतकरी सांगतात.

गतवर्षीच्या रब्बी हंगामात वैजापूर तालुक्यात कांद्याची सुमारे १६ हजार ५०० हेक्टरवर कांद्याची लागवड झाली होती. यंदा रब्बीतील कांद्याची लागवड १८ हजार ५०० हेक्टरवर पोहोचली आहे. लागवड करताना शेतकरी साडेतीन फुटाच्या बेड पद्धतीने तसेच पूर्वहंगामी उसामध्ये व सुधारित पेरणी यंत्राच्या साह्याने कांदा लागवडीला प्राधान्य देत असल्याची स्थिती आहे.

उत्पादन खर्च वाढल्याने अलीकडच्या काळात सुमारे ५० ते ६० हजारापर्यंत एकरी खर्च शेतकऱ्यांना येतो आहे. सरासरी १५० क्विंटलपर्यंत शेतकरी एकरी उत्पादन काढतात. अर्थात, याला हवामानाची प्रतिकूलता अपवाद असू शकते. तालुक्यात सुमारे ४५०० कांदा चाळी उभारण्यात आल्या आहेत.

साधारणतः नऊ महिन्यांपर्यंत या कांदा चाळीमध्ये कांदा साठवून शेतकऱ्यांना त्याची टप्प्याटप्प्याने विक्री करणे शक्य होते. त्यामुळे सजग शेतकरी बाजारात जास्तीची आवक होणार नाही याचा अंदाज घेऊन कांदा विक्रीसाठी नेण्याचे नियोजन करत आहेत.

अलीकडे १००० ते २४०० रुपये प्रति क्विंटलपर्यंत कांद्याला दर मिळतो आहे. इतर पिकांच्या तुलनेत कांदा शेतकऱ्यांना काहीतरी देऊनच जात असल्याने अलीकडे कांद्याकडे शेतकऱ्यांचा कल मोठ्या प्रमाणात वाढला आहे.

कांदा चाळीला वाढवावे अनुदान

माहितीनुसार, कांदा चाळीला २५ टन क्षमतेसाठी ८७ हजार ५०० रुपये अनुदान दिले जाते. मुळात ती कांदा चा उभारणीसाठी किमान अडीच ते तीन लाख रुपये खर्च येतो. शेतकऱ्यांना कांदा चाळीसाठी मिळणारे अनुदान वाढविल्यास शेतकरी मोठ्या प्रमाणात कांदा चाळी उभ्या करतील. त्याचा फायदा बाजाराचा अंदाज घेऊन टप्प्याने कांदा बाजारात आणण्याला प्राधान्य देण्यासाठी होऊ शकतो असे जाणकार शेतकऱ्यांचे म्हणणे आहे.