Jayakwadi Dam: ‘जायकवाडी’तील उपयुक्त पाणीसाठा ५२ टक्क्यांवर

Chhatrapati Sambhajinagar News: छत्रपती संभाजीनगर येथील जायकवाडी प्रकल्पातील उपयुक्त पाणीसाठा ५२.३६ टक्क्यांवर पोहोचला आहे. सोमवारी (ता.७) सकाळी ६ वाजता प्रकल्पात २४ हजार १९२ क्युसेकने पाण्याची आवक सुरू होती.

प्रकल्प प्रशासनाच्या माहितीनुसार, नाथसागरात नाशिक भागात झालेल्या जोरदार पावसामुळे गोदावरी नदी दुथडी भरून वाहत आहे. त्यामुळे जायकवाडीच्या पाणीसाठ्यातही वाढ होत आहे. प्रकल्पाची पाणीपातळी १५१२ फूट (४६०.८५८ मिटर) इतकी आहे.

प्रकल्पात एकूण पाणीसाठा १८७४.८५५ दशलक्ष घनमीटर, तर जिवंत पाणीसाठा ११३६.७४९ दशलक्ष घनमीटर झाला आहे. सोमवारी सकाळी प्रकल्पात पाण्याची आवक २४ हजार १९२ क्युसेकने सुरू होती, अशी माहिती धरण शाखा अभियंता मंगेश शेलार यांनी दिली.

नाशिक, अहिल्यानगर भागांत जून महिन्यात मुसळधार पाऊस झाला. त्यामुळे जायकवाडी प्रकल्पाची पाणीपातळी वाढण्यास सुरुवात झाली. पावसाळा सुरू होण्याअगोदर धरणात २९ टक्के पाणीसाठा होता. या पाणीसाठ्यात सुरुवातीला हळूहळू पाणी येण्यास सुरुवात झाली.

नाशिक जिल्ह्यात गोदावरीला पूर आल्यानंतर पाणीपातळी वेगाने वाढू लागली. त्यामुळे जायकवाडी प्रकल्पातील उपयुक्त पाणीसाठा ५२ टक्क्यांहून अधिक वाढला आहे. दरम्यान, नाथसागर धरणाच्या पाणलोट क्षेत्रात असणारी २२ धरणे ही भरली आहेत.