Unseasonal Rain : अवकाळीचा कोल्हापूर-सांगलीला फटका! कोल्हापुरात उस जमीनदोस्त; सांगलीत द्राक्ष बागायतदार चिंतेत

Pune News : गेल्या काही दिवसापासून राज्याच्या विविध बागात अवकाळी पावसाने हजेरी लावली आहे. यामुळे सोयाबीन, कापूस, तूर आणि कांद्याला फटका बसला आहे. तर आता कोल्हापूर-सांगली जिल्ह्यात देखील शनिवारी पडलेल्या पावसामुळे ऊस आणि द्राक्ष पिकाचे नुकसान झाले आहे.

कोल्हापुरात अवकाळीचा तडाखा

कोल्हापूर जिल्ह्यातील विविध भागाला शनिवारी रात्री मुसळधार अवकाळी पावसाने तडाखा दिला. पन्हाळा, शिरोळ, हातकणंगले, शाहुवाडी, चंदगड, करवीर तालुक्यांना पावसाने झोडपून काढले. यामुळे ऊसतोड खोळांबली असून यामुळे साखर कारखाने, गुऱ्हाळघरे, वीटभट्टीमालक अडचणीत आले आहेत.

मुसळधार अवकाळी पावसाचे पाणी साचल्याने ऊसतोड थांबली. तर उसाचे उभे पीक जमीनदोस्त झाले आहे. यामुळे ऐन तोडणीला आलेला उसाची तोडणी होऊ शकलेली नाही. तर तोडप्यांनी आपला मोर्चा कारखान्यांच्या सागण्याने रस्त्याशेजारील ऊसतोडीकडे वळवला आहे.

गुऱ्हाळ घरांवर परिणाम

जिल्ह्यातील झालेल्या अवकाळीमुळे साखर कारखान्यांवर परिणाम झाला असतानाच याचा फटका गुऱ्हाळ घरांना देखील बसला आहे. मुसळधार पाऊस आणि साचलेल्या पावसामुळे शेतात चिखल झाला आहे. यामुळे ऊस शेताबाहेर काढण्यासाठी मजूर लावावे लागत आहेत. तर यासाठी जादाचे जैसे मोजावे लागत आहेत. तर जेथे मजूर नाहीत अशा ठिकाणी जेसीबी यंत्रणा लावावी लागत आहे. यामुळे गुऱ्हाळ घर चालकांना आर्थिक नुकसान सहन करावा लागत आहे.

द्राक्ष बागायतदारांची चिंता वाढली

गेल्या दोन दिवसापासून सांगलीत ढगाळ वातावरण तयार झाले. शुक्रवारी आणि शनिवारी सलग दोन दिवस शिराळा तालुक्यातील काही भाग आणि आष्टा, इस्लामपूर परिसरात पाऊस झाला. यामुळे पावसासोबतच ढगाळ वातावरणामुळे द्राक्ष बागायतदारांची चिंता वाढली आहे. तर येथेही ऊसतोडीत अडचणी निर्माण झाल्या आहेत.

जिल्ह्यातील मिरज, आष्टा, इस्लामपूर परिसरात पावसामुळे एकीकडे रब्बी पिकांना पोषक स्थिती निर्माण झाली आहे. तर दुसरीकडे सखल पाणी साचल्याने ऊसतोडी थांबवावी लागली आहे. गेल्या चार दिवसांपासून ढगाळ वातावरण आणि पावसामुळे द्राक्ष बागायतदारांची चिंता वाढली आहे.