Nagpur News: कापूस उत्पादकता वाढीच्या अनुषंगाने केंद्रीय वस्त्रोद्योग मंत्रालयाकडून महत्त्वाकांक्षी अतिसघन कापूस लागवड प्रकल्प राबविला जात आहे. यातून वाढलेल्या उत्पादकतेची माहिती घेण्यासाठी केंद्रीय वस्त्रोद्योगमंत्री गिरिराज सिंग यांनी अकोल्यातील एका शेतकऱ्याला थेट फोन केल्याची माहिती समोर आली आहे. दिलीप ठाकरे असे या शेतकऱ्याचे नाव असून, ते अकोला जिल्ह्यातील रहिवासी आहेत.
‘सीआयसीआर’च्या वतीने आयोजित सत्कार सोहळ्यासाठी नागपूरला आले असता दिलीप ठाकरे यांनी ही माहिती दिली. देशभरात सुमारे १३० लाख हेक्‍टर इतक्‍या मोठ्या क्षेत्रावर कापसाची लागवड होते. लागवड क्षेत्र जगाच्या इतर देशांच्या तुलनेत सर्वाधिक असताना उत्पादकतेच्या बाबतीत मात्र भारताची पिछाडी आहे.
लागवड आणि उत्पादकता क्षेत्रातील ही दरी दूर करण्याच्या उद्देशाने अनेक तांत्रिक बाबींवर केंद्र शासनाकडून भर दिला गेला आहे. केंद्रीय कापूस संशोधन संस्थेच्या माध्यमातून देशातील आठ राज्यांमध्ये अतिसघन कापूस लागवड प्रकल्प या धोरणाचा एक भाग म्हणून राबविला जात आहे. त्या माध्यमातून कापसातील अंतर तीन फूट बाय अर्धा फूट ठेवले जाते.
त्यानुसार प्रतिएकर झाडांची संख्या २९ हजार ४० पर्यंत पोहोचते. अतिसघन कापूस लागवडीच्या माध्यमातून प्रतिएकर १२ ते १५ क्‍विंटलपेक्षा अधिकची उत्पादकता होते. काही निवडक शेतकऱ्यांना १७ क्‍विंटलपेक्षा अधिक उत्पादकता मिळाली असे निष्कर्ष आहेत. पारंपरिक लागवड पद्धतीत ९ ते १० हजार झाडांची संख्या व कापसाची एकरी उत्पादकता ५ ते सात क्‍विंटल इतकी अत्यल्प मिळत असल्याचेही प्रकल्पातून समोर आले आहे.
प्रयोगशील शेतकरी दिलीप ठाकरे पाटील (ता. बाळापूर, जि. अकोला) यांनी गेल्या काही वर्षांपासून आपल्यास्तरावर अतिसघन कापूस लागवडीत सातत्य राखले आहे. विशेष म्हणजे हंगामअखेरीस ते कापसाची वेचणीदेखील खासगी कंपनीच्या यंत्राद्वारे करतात. त्यावरील खर्चाचा भारही तेच सहन करतात. शासनाच्या काही समित्यांवर देखील ते आहेत. याच दरम्यान त्यांच्या कार्याविषयी केंद्रीय वस्त्रोद्योगमंत्री गिरिराज सिंग यांना माहिती मिळाली. मंत्री श्री. सिंग यांनी अकोला जिल्ह्यात अतिसघन कापूस लागवड प्रकल्पाचे मॉडेल विकसित करण्याचा निर्णय घेतला आहे.
अकोला जिल्ह्यात सुमारे ५० हजार हेक्‍टरवर अतिसघन कापूस लागवड प्रकल्पाची अंमलबजावणी होणार आहे. या पार्श्‍वभूमीवर यंदा या प्रकल्पातून किती उत्पादकता मिळाली हे जाणून घेण्यासाठीमंत्री गिरिराज सिंग यांनी थेट दिलीप ठाकरे यांच्याशी संवाद साधला.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.