Mango Festival Sangli : सांगलीतील आंबा महोत्सवात ३३ लाखांवर उलाढाल

Sangli Amba Mahotsav : महाराष्ट्र राज्य कृषी पणन महामंडळ आणि सांगली कृषी उत्पन्न बाजार समिती यांच्यातर्फे सुरू असलेल्या आंबा महोत्सवात सोमवारी (ता. १२) शेवटच्या दिवशी सव्वा चार लाख रुपयांची तर पाच दिवसांत सुमारे ३३ लाख ६० हजार रुपयांची उलाढाल झाली.

सांगलीमध्ये आंबा महोत्सवाचे हे चौथे वर्ष आहे. यंदा तासगाव आणि आटपाडी या दोन तालुक्यांमध्ये आंबा महोत्सव झाला. या दोन्ही तालुक्यांतही आंबा महोत्सवाला उत्स्फूर्त प्रतिसाद मिळाला. सांगली येथील बाजार समितीत गुरुवार (ता. ८) ते सोमवार (ता. १२) या पाच दिवसांच्या महोत्सवात सुमारे १७ स्टॉलवर शेतकरी आंबा विक्रीसाठी घेऊन आले. रत्नागिरी, देवगड हापूससह सांगली जिल्ह्यामध्ये उत्पादित होणाऱ्या विविध २० हून अधिक आंब्याच्या जातींची विक्री या महोत्सवात झाली.

माळशिरस, रत्नागिरी, देवरुख, चिपळूण, पेड, तासगाव, खानापूर, मिरज तालुक्यातून आंबा उत्पादक शेतकऱ्यांनी आपले स्टॉल लावले होते. देवगड हापूस, रत्नागिरी हापूस, केसर, रत्ना, जरदाळू, मल्लिका, खोबरी, राजापुरी, दूध पेढा, नीलम, सोनपरी, तोतापुरी, साखरगोटी, मलगोबा, रायवळ, यासह विविध प्रकारच्या आंब्याच्या जाती येथे विक्रीसाठी उपलब्ध होत्या.

यावेळी पणन महामंडळाचे कोल्हापूर विभागाचे उपसरव्यवस्थापक डॉ. सुभाष घुले, पणन अधिकारी ओंकार माने उपस्थित होते.खुडूस (ता. माळशिरस) येथील शेतकरी डॉ. केशव सरगर म्हणाले, ‘पणन महामंडळाच्या सर्व ठिकाणच्या महोत्सवात मी स्टॉल लावतो. इतर ठिकाणांसारखाच सांगलीकरांनीही या महोत्सवाला चांगला प्रतिसाद दिला. ग्राहकांना थेट आंबा विक्रीमुळे चांगला दर मिळाला आहे. सहभागी शेतकऱ्यांना प्रशस्तीपत्र बाजार समितीचे सभापती सुजय शिंदे, जिल्हा पणन अधिकारी ओंकार माने या दोघांच्या हस्ते देण्यात आले.