Tur Procurement: तूर खरेदीचे चुकारे रखडले

Akola News: राज्यात हमीभावाने सुरू असलेल्या तूर खरेदीचे २९ मार्चपासून चुकारे थकित असल्याचे शेतकरी सांगत आहेत. काही शेतकऱ्यांना मध्यंतरी मॅसेज पाठविण्यात आले. मात्र चुकारे जमा झालेले नसल्याचा प्रकार समोर आलेला आहे. यंत्रणेत तांत्रिक अडचणी निर्माण झाल्याने चुकाऱ्यांची प्रक्रिया रखडल्याचे कारण अधिकारी देत आहेत.

या हंगामात बाजारपेठांमध्ये दर कमी असल्याने शेतकरी शासनाला हमीभावाने (७५५०) तूर विक्री करीत आहेत. राज्यात आतापर्यंत ‘नाफेड’ने ५ लाख १५ हजार क्विंटलपर्यंत तर ‘एनसीसीएफ’ने १ लाख ४४ हजार क्विंटलपेक्षा अधिक खरेदी केली. दोन्ही संस्था मिळून साडेसहा लाख क्विंटलपेक्षा अधिक तुरीची खरेदी झाली आहे. मार्च एण्ड नुकताच आटोपला आहे.

अशा स्थितीत या खरेदी केलेल्या शेतीमालाचे चुकारे गेले महिनाभर मिळालेले नसल्याने शेतकरी चिंतातुर झालेले आहेत. अनेकांना सध्या पैशांची तातडीची निकड तयार झालेली आहे. मार्च महिन्याच्या शेवटच्या आठवड्यापासून काही शेतकऱ्यांचे चुकारे झालेले नाहीत. मध्यंतरी काही शेतकऱ्यांना चुकाऱ्यांबाबत संदेश मिळाले. काहींना रकमा आल्या तर बरेच शेतकरी अद्याप प्रतीक्षा करीत आहेत.

सरकारकडून हमीभावाने खरेदी करण्यात आलेल्या तुरीचे पैसे अजूनही अनेक खात्यात जमा झालेले नाहीत. खरेदी प्रक्रिया पूर्ण होऊन कुणाचा एक महिना, कुणाला १५ दिवसांचा कालावधी उलटून गेला आहे. चुकारे मिळालेले नसल्यामुळे तीव्र नाराजी पसरली आहे. शासनाने यंदा प्रति क्विंटल ७५५० हमीभाव जाहीर करून तूर खरेदी सुरू केली.

या वर्षी खरेदी केंद्रांवर शेतकऱ्यांनी मोठ्या प्रमाणात तूर विक्री केली. दरम्यान, काही शेतकऱ्यांचे म्हणणे आहे की, वेळेवर माल विकून, सर्व कागदपत्रे पूर्ण केली, तरीही त्यांना पैसे मिळालेले नाहीत. आगामी हंगामासाठी खते, बियाणे, मजुरीसाठी पैशांची निकड आहे. यंत्रणांनी याकडे गांभिर्याने लक्ष देण्याची आवश्‍यकता आहे.

मुदतवाढीची मागणी

तूर विक्रीसाठी शेतकऱ्यांना नावनोंदणी मुदत बुधवारी (३० एप्रिल) संपुष्टात आली. बाजारपेठांमध्ये तुरीचा दर हमीभावाच्या आत मिळत असल्याने व शेतकऱ्यांचा शासकीय खरेदीकडे असलेला ओढा पाहता तूर नोंदणीला मुदतवाढ द्यावी, अशी मागणी यंत्रणास्तरावरून शासनाकडे झालेली आहे. यापूर्वी दोन वेळा नावनोंदणीला मुदतवाढ देण्यात आली होती.