Tur Sowing : खानदेशात तूर लागवड वाढली; पीक फुलोऱ्यावर

Jalgaon News : खानदेशात तूर पीक फुलोऱ्यावर आले आहे. पीकस्थिती चांगली आहे. शेतकरी अळीनाशके, बुरशीनाशके, कीटकनाशकांची फवारणी त्यात घेत आहेत. तूर लागवड खानदेशात यंदा वाढली आहे.

मागील हंगामात कमी पावसातही तूर पीक बऱ्यापैकी आले. तसेच तुरीला दरही चांगले मिळाले. तूर दर टिकून होते. यामुळे यंदा अनेक शेतकरी तुरीकडे वळले. तूर लागवड यंदा वाढली. जळगाव जिल्ह्यातील लागवड ११ हजार हेक्टरवर पोहोचली आहे. अनेकांनी तूर व सोयाबीनचे मिश्र पीक घेतले आहे.

धुळे व नंदुरबारमध्ये मिळून सुमारे तीन हजार हेक्टरवर तूरलागवड झाली आहे. जळगाव जिल्ह्यातील रावेर, मुक्ताईनगर, बोदवड, जामनेर, अमळनेर आदी भागांत मुख्य पीक म्हणून तूरलागवड केली. धुळ्यातील शिरपूर, शिंदखेडा, साक्री, नंदुरबारमधील नंदुरबार, नवापूर भागात तूर अधिक आहे. जळगावातील रावेर, मुक्ताईनगर आदी भागांत जूनमध्येच ठिबक सिंचनच्या साह्याने पूर्वहंगामी तुरीची जूनमध्ये लागवड झाली आहे.

पाऊसमान चांगले राहिले, यामुळे कोरडवाहू क्षेत्रातील तूरही जोमात आहे. अनेकांनी दोन वेळेस तुरीला बेसल डोस दिला आहे. तसेच पावसासह ढगाळ व विषम वातावरण अनेक दिवस राहिल्याने किडींची समस्याही आहे. यामुळे तूर पिकात दोन-तीन फवारण्याही घ्याव्या लागल्या आहेत. फवारणीतूनही विविध खते शेतकऱ्यांनी तूर पिकास दिली आहेत.

तूर पिकाची चांगली वाढ झाल्याने सध्या त्यात बैलांकरवी आंतरमशाग करणे शक्य नाही. अनेकांचे तूर पिकातील उडीद, सोयाबीनचे आंतरपीक हाती आले आहे. हे पीक काढल्यानंतर त्यात तणही होते. तणनियंत्रणही शेतकऱ्यांनी केले आहे. काही दिवसांपासून पाऊस नसल्याने पिकात फवारणीची कामेही गतीने झाली. पिकात लवकरच किंवा दिवाळीच्या काळात शेंगा दिसू लागतील, अशी स्थिती आहे.