Ginger Market Deals : आले उत्पादक, व्यापाऱ्यांशी चर्चेतून तोडग्याचा प्रयत्न

Pune News : सरकारने शेतकऱ्यांच्या हितासाठी सरसकट आल्याचे सौदे करावेत, असा निर्णय जाहीर केला आहे. परंतु त्याची अंमलबजावणी होत नसल्यामुळे स्वाभिमानी शेतकरी संघटनेने बाजार समितीत आंदोलन करत आल्याचे सौदे बंद पाडले होते. त्या पार्श्वभूमीवर रविवारी बाजार समितीचे सभापती दिलीप काळभोर, सचिव डॉ. राजाराम धोंडकर, संचालक गणेश घुले यांनी बाजारात पाहणी करून विविध व्यापारी, शेतकरी यांच्याशी चर्चा केली.

बाजारात येणारे आले नविन आणि जुने असे एकत्रित येते. त्याची वर्गवारी करून अडते त्याचे सौदे करत आहेत. यामुळे शेतकऱ्यांचे मोठे नुकसान होत असल्याचे स्वाभिमानी शेतकरी संघटनेचे म्हणणे आहे. यावर तोडगा काढण्यासाठी संपूर्ण बाजारात सभापती, सचिवांनी पाहणी करत आले व्यापाऱ्यांशी आणि उत्पादक शेतकऱ्यांशी चर्चा केली. याबाबत तोडगा काढण्याचा प्रयत्न प्रशासनाकडून सुरू आहे.

एकत्रित आले विकले तर त्याला भाव मिळत नाही. तसेच त्यामुळे शेतकऱ्यांचेच नुकसान होईल. वर्गवारी केली तर भाव जास्त मिळेल. बाजार समितीत जास्त आले हे व्यापाऱ्यांनी खरेदी केलेले येते. शेतकऱ्यांचा माल थोडाच येतो. त्यामुळे व्यापाऱ्यांनी घेतलेला माल कसा विकायचा हा आमचा प्रश्न असल्याचा मुद्दा काही व्यापाऱ्यांनी मांडला. तसेच काही शेतकऱ्यांनी देखील वर्गवारी करूनच आले विकले गेले पाहिजे, असे म्हणणे मांडले. तर काही शेतकऱ्यांनी सरसकट सौदे करण्याची मागणी केली. त्यामुळे बाजार समिती यावर काय भूमिका घेणार याकडे शेतकरी आणि व्यापाऱ्यांचे लक्ष लागले आहे.