Election Training : घनसावंगीत १७७२ कर्मचाऱ्यांना दिले प्रशिक्षण

Jalna News : विधानसभा सार्वत्रिक निवडणुकीसाठी जिल्हा निवडणूक निर्णय अधिकारी तथा जिल्हाधिकारी डॉ. श्रीकृष्ण पांचाळ, अप्पर जिल्हाधिकारी रिता मेत्रेवार, उपजिल्हा निवडणूक अधिकारी शशिकांत हदगल यांच्या मार्गदर्शनाखाली मतदान केंद्राध्यक्ष, सहायक मतदान केंद्राध्यक्ष आणि इतर मतदान अधिकारी यांचे दुसरे प्रशिक्षण सोमवारी (ता. ११) व मंगळवारी (ता. १२) तालुका क्रीडा अधिकारी कार्यालय, राजेगाव रोड, घनसावंगी येथे झाले. यामध्ये दोन दिवसांत १७७२ कर्मचाऱ्यांना प्रशिक्षण देण्यात आले.

सदरील प्रशिक्षण वर्गास मतदान केंद्राध्यक्ष, सहायक मतदान केंद्राध्यक्ष आणि इतर मतदान अधिकारी निहाय कर्तव्य व जबाबदारींचे सूक्ष्म मार्गदर्शन पीपीटीद्वारे सादरीकरण करण्यात आले. त्यामध्ये लोकप्रतिनिधित्व अधिनियम, १९५१ च्या कलमान्वये मतदान केंद्राध्यक्ष, सहायक मतदान केंद्राध्यक्ष आणि इतर मतदान अधिकारी म्हणून नेमणूक करण्यात आली आहे.

निवडणूक आयोगाच्या प्रतिनियुक्तीवर असल्याबाबतची जाण करून देण्यात आली. मतदान प्रक्रियेतील असलेले महत्त्वाचे टप्प्यांबाबत माहिती, साहित्य वाटप, मतदान पूर्व, मतदानादरम्यान, मतदान संपल्यानंतरच्या संपूर्ण जबाबदाऱ्या पार पाडणे, निवडणूक साहित्य स्वीकृती व तपासणी करणे, ईव्हीएम तपासणी, व्हीव्हीपॅट संबंधी माहिती, चिन्हांकित फोटो मतदार यादी,

मतदानाच्या आदल्या दिवशी करावयाची तयारी, मतदान केंद्रावर करावयाच्या बाबी, निवडणूक कायद्याची अंमलबजावणी, मॉकपोल बाबतचा फ्लो चार्ट, मतदानासंबंधीची गुप्तता, मतदाराची ओळख पटविण्यासाठी आवश्यक कागदपत्रे, महत्त्वाचे अहवाल, नमूने तयार करणे तसेच या निवडणुकीमध्ये काही नवीन बाबींचा समावेश करण्यात आलेला आहे.

जे मतदार प्रत्यक्ष मतदान केंद्रावर येऊन मतदान करून शकत नाहीत, त्यामध्ये ८० वर्षांवरील ज्येष्ठ मतदार, दिव्यांग मतदार, कोविड-१९ संबंधित मतदार, अत्यावश्यक सेवा पुरविणारे मतदार यांच्यासाठी टपाली मतपत्रिकेद्वारे त्यांचे मतदान करून घेण्याबाबत सविस्तर माहिती मनीषा दांडगे, निवडणूक निर्णय अधिकारी तथा उपविभागीय अधिकारी, अंबड यांनी दिली.