Palkhi Traffic Route : पालखी सोहळ्यानिमित्त वाहतूक मार्गात बदल

Solapur News : श्री संत ज्ञानेश्‍वर महाराज पालखी सोहळा ११ जुलै रोजी नातेपुते आणि संत श्री तुकाराम महाराज यांची पालखी १२ जुलै रोजी अकलूज हद्दीत प्रवेश करणार आहे. दोन्ही पालखी सोहळ्यात लाखो वारकरी सहभागी होणार असल्याने वारकरी हे पायी पंढरपूरकडे येत असतात.

पालखी बरोबर त्यांच्या दिंड्या व वाहने ही सोबत असतात, त्यामुळे पालखी मार्गावर वाहतुकीची कोंडी होऊ नये, यासाठी ९ जुलै ते १८ जुलै या कालावधीत अकलूज व पंढरपूर या पालखी मार्गावरील वाहतूक मार्गात बदल करण्यात आला आहे.

जिल्हा पोलिस अधीक्षक शिरीष सरदेशपांडे यांनी यासंबंधीचे आदेश पारीत केले आहेत. पंढरपूरकडून पुणे येथे जाणारे वाहने वाखरी-साळमुख फाटा-पिलीव-म्हसवड-फलटण किंवा पंढरपूर-टेंभुर्णी पर्यायी मार्गाने पुणेकडे जातील.

पुणे-फलटण येथून पंढरपूरकडे येणारी वाहने फलटण-म्हसवड-पिलीव-साळमुख चौक-पंढरपूर अथवा पुणे-टेभुर्णी मार्गे पंढरपूरकडे येतील. वेळापूर येथून पंढरपूरकडे येणारी वाहने साळमुख चौक-सातारा रोड या पर्यायी मार्गाने पंढरपूरकडे येतील. सांगोला येथून पुणेकडे जाणारी वाहने (सांगोला येथून पुणेकडे जाणारी जड वाहतूक वगळून - सांगोला-साळमुख चौक वेळापूर-अकलूज-इंदापूर) या पर्यायी मार्गाने जातील.

पुणे येथून इंदापूर मार्ग पंढरपूर येथे येणारी वाहने टेंभुर्णी-पंढरपूर पर्यायी मार्गानी येतील. अकलूज येथून पंढरपूर मार्गे सोलापूरकडे जाणारी वाहने अकलूज-टेभुर्णी या पर्यायी मार्गाने जातील. सोलापूर येथून पंढरपूरमार्गे अकलूजकडे जाणारी वाहने सोलापूर-टेंभुर्णी-अकलूज या पर्यायी मार्गाने जातील, असेही त्यांच्या आदेशात म्हटले आहे.