Ashadhi Wari : पालखी मार्गावरील वाहतुकीत २९ जून ते १० जुलैदरम्यान बदल

Solapur News : संत ज्ञानेश्वर महाराज पालखी सोहळा ३० जून रोजी नातेपुते पोलीस ठाणे हद्दीत व १ जुलै रोजी श्री तुकाराम महाराज यांची पालखी अकलूज पोलीस ठाणे हद्दीत प्रवेश करणार आहे. या दरम्यन पालखी मार्गावरील वाहतुकीत २९ जून ते १० जुलै या कालावधीत बदल करण्यात आला आहे.

श्री संत ज्ञानेश्वर महाराजांची पालखी ही नातेपुते, माळशिरस, वेळापूर, भंडीशेगाव, वाखरी मार्गे पंढरपूर कडे येत असते. श्री संत तुकाराम महाराजांची पालखी अकलूज, श्रीपूर, बोरगाव, तोंडले-बोडले, पिराची कुरोली, भंडीशेगाव, वाखरी मार्ग पंढरपूरकडे येत असते.

दोन्ही पालखी सोहळ्यात लाखो वारकरी सहभागी होणार असल्याने वारकरी हे पायी पंढरपूरकडे येत असतात. पालखीबरोबर त्यांच्या दिंड्या व वाहने ही समवेत असतात. त्यामुळे पालखी मार्गावर वाहतुकीची कोंडी होऊ नये याकरिता पालखी सोहळ्यादरम्यान पालखी सोहळ्यातील वाहने वगळता इतर सर्व वाहनांना प्रवेश बंद करणे आवश्यक आहे.

त्यासाठी २९ जून ते ७ जुलैपर्यंत अकलूज व पंढरपूर या पालखी मार्गावर वाहतुकीची कोंडी निर्माण होऊ नये, म्हणून पालखी दिंड्यासमवेत असणारी वाहने यांच्याशिवाय इतर सर्व प्रकारच्या वाहनांना (अत्यावश्यक सेवेची वाहने वगळून) उपलब्ध असणारे पर्यायी मार्गाचा वापर करावा, असे सुचवण्यात आले आहे.

मार्ग पुढीलप्रमाणे

पंढरपूरकडून पुणे येथे जाणाऱ्या वाहनांकरिता पर्यायी मार्ग-वाखरी-साळमुख फाटा-पिलीव-म्हसवड-फलटण किंवा पंढरपूर-टेंभुर्णी-पुणे

पुणे-फलटण येथून पंढरपूरकडे येणाऱ्या वाहनांकरिता पर्यायी मार्ग-फलटण-म्हसवड-पिलीव-साळमुख चौक-पंढरपूर. किंवा पुणे-टेभुर्णी-पंढरपूर.

वेळापूर येथून पंढरपूरकडे येणाऱ्या वाहनांकरिता-पर्यायी मार्ग-साळमुख चौक-सातारा रोड-पंढरपूर

सांगोला येथून पुण्याकडे जाणाऱ्या वाहनांकरिता (सांगोला येथून पुणेकडे जाणारी जड वाहतूक वगळून) पर्यायी मार्ग-सांगोला-साळमुख चौक वेळापूर-अकलुज-इंदापूर.

पुणे येथून इंदापूर मार्गे पंढरपूर येथे येणारी वाहने पर्यायी मार्ग-पुणे-टेंभुर्णी-पंढरपूर

अकलूज येथून पंढरपूरमार्गे सोलापूरकडे जाणारी वाहने-पर्यायी मार्ग-अकलूज-टेभुर्णी-सोलापूर

सोलापूर येथून पंढरपूरमार्गे अकलूजकडे जाणारी वाहने-पर्यायी मार्ग-सोलापूर-टेंभुर्णी-अकलूज