Ashadhi Wari: पंढरपूरमध्ये सायकलस्वारांचा रिंगण सोहळा

Latur News: हजारो वर्षांची परंपरा असलेल्या आषाढी वारीत लाखो विठ्ठल भक्त आळंदी ते पंढरपूर पायी सहभागी होतात. आता या वारीचाच भाग म्हणून आषाढीनिमित्त पांडुरंगाला वंदन करत पर्यावरणाचा जागर करत रविवारी (ता. २२) पंढरपूरमध्ये विविध शहरांतील ९७ क्लबच्या तब्बल पाच हजार सायकलस्वारांचा (सायकलिस्ट) रिंगण सोहळा झाला.

या वेळी ‘विठू नामाचा गजर आणि पर्यावरण पूरक घोषणांनी पंढरपूर नगरी दुमदुमून गेली होती.आषाढी वारीनिमित्त विठ्ठलाच्या चरणी राज्याच्या काना कोपऱ्यातून लाखो भाविक नतमस्तक होतात, संत ज्ञानेश्वर माऊलींची आळंदी येथून निघालेली पालखी मजल दर मजल करत तब्बल महिना भराचा प्रवास करत आषाढी एकदशीला पंढरीत दाखल होते.

हजारो वर्षांची परंपरा असताना या परंपरेचा एक भाग म्हणून राज्यातील पर्यावरण प्रेमी नागरिकांकडून मागील पाच वर्षांपासून राज्याच्या कानकोपऱ्यातून सायकल वारी काढून पर्यावरण संतुलन अबाधित राहावे यासाठी संदेश देण्याचा प्रयत्न करत आहेत. या वारीचे यंदाचे यजमानपद लातूरला मिळाले.

लातूर सायकलिस्ट क्लबच्या अथक प्रयत्नांतून यावर्षी भक्तांबरोबरच राज्याच्या कानाकोपऱ्यातून आलेल्या हजारो सायकलिस्टनी राज्याच्या विविध शहर ते पंढरपूर वारी काढून पर्यावरण संतुलनाचा संदेश घेऊन रविवारी (ता. २२) भागवत एकादशीदिनी वारीपूर्वीच पंढरपुरात सायकल रिंगण सोहळा साजरा केला.

यामध्ये पाच हजार सायकलिस्टनी सहभाग नोंदविला. यजमानपद असलेल्या लातूर सायकलिस्ट क्लबने विठ्ठल नामाचा गजर करतानाच पर्यावरणाचा जागर करत शुक्रवारी (ता. २०) लातूरच्या दीडशेहून अधिक सायकलस्वारांनी लातूर ते पंढरपूर असा प्रवास करत व रविवारी विशाल सायकल रिंगणात सहभागी झाल्याची माहिती लातूर सायकलिस्ट क्लबचे श्रवण उगले व अभिजीत देशपांडे सरसंबेकर यांनी दिली.