Tourism Season : पर्यटकांची खुष्‍कीच्या मार्गाला पसंती

Pali News : वाकण-पाली-खोपोली राज्य महामार्गाचे रुंदीकरण काही महिन्यांपूर्वी पूर्ण झाले आहे. पर्यटन हंगाम सुरू झाला असून खुष्‍कीचा मार्ग म्‍हणून चालकांसह पर्यटक, प्रवाशांची वर्दळ वाढली आहे. मुंबई-गोवा महामार्गाचे काम अजूनही अपूर्ण आहे. शिवाय अनेक ठिकाणी रस्त्याची दुरवस्था झाली आहे. धुरळा व वाहतूक कोंडी नित्याचीच आहे.

हा त्रास टाळण्यासाठी पर्यटक व प्रवासी वाकण-पाली-खोपोली राज्य महामार्गावरून प्रवास करण्यास पसंती देत आहेत. शिवाय अवजड व औद्योगिक वाहनांचीही वर्दळ या मार्गावरून मोठ्या प्रमाणात होत आहे.

जैवविविधतेने नटलेले निसर्ग सौंदर्य व विस्तीर्ण समुद्र किनारा यामुळे दिवाळीनंतर नाताळपर्यंत पर्यटकांची पावले रायगड जिल्ह्याकडे वळतात. सध्या पुणे-मुंबईसह राज्याबाहेरील पर्यटकही जिल्ह्यातील पर्यटन स्थळांवर दाखल होत आहेत. त्‍यामुळे हॉटेल व्यावसायिक, खानावळी, छोटे-मोठे दुकानदार, वाहतूकदार, घोडेस्‍वारी आदींची चलती आहे.

पाली-खोपोली राज्यमार्ग पूर्वी बांधकाम विभागाच्या अखत्यारित होता. काही वर्षांपूर्वी राज्य रस्ते विकास महामंडळाकडे तो हस्तांतर करून रुंदीकरण करण्यात आले. २०० कोटींचा निधी खर्च करून काँक्रिटीकरण, साईडपट्टी, नाले, वृक्षारोपण आदी कामे केली आहेत.

नवीन पुलांची निर्मिती

वाकण-पाली-खोपोली मार्गावर भालगुल व जांभूळपाडा येथील नदीवरील नवीन पुलाचे काम पूर्णत्वास आले आहे. तर पाली अंबा नदीवरील एका बाजूच्या पुलाचे काम पूर्ण होऊन वाहतूक सुरू झाली आहे. तर दुसऱ्या बाजूचे काम युद्धपातळीवर सुरू आहे. तब्बल २५ कोटींच्या निधीतून अधिक क्षमता, रुंदी आणि उंचीचे पूल तयार करण्यात आले आहेत.

शेतकऱ्यांचा आक्षेप

रुंदीकरण्यासाठी अनेक शेतकऱ्यांच्या जमिनी गेल्या आहेत. काम झाले, तरी शेतकऱ्यांना भरपाई मिळालेली नाही. रस्‍त्‍यासाठी बेकायदा जमीन अधिगृहण केल्याचा आरोप करत काही शेतकऱ्यांनी याबाबत महाराष्ट्र शासन, एमएसआरडीसीविरोधात उच्च न्यायालयात याचिका दाखल केली आहे.