Agriculture Subsidy: शंभर टक्के अनुदानावरील बियाणे मागणीचा आज शेवटचा दिवस

Ahilyanagar News: राष्ट्रीय अन्न सुरक्षा आणि पोषण अभियान व राष्ट्रीय खाद्यतेल अभियानअंतर्गत पिकांच्या उत्पादकता वाढीसाठी व बियाणे बदलाचे महत्त्व अधिक आहे. त्या अनुषंगाने सुधारित व संकरित वाणांच्या प्रसाराच्या दृष्टीने प्रमाणित बियाणे वितरण व पीक प्रात्यक्षिकाचा कार्यक्रम राबविण्यात येत आहे.

त्यासाठी शंभर टक्के अनुदानावर बियाणे मागणीसाठी आजचा (ता. ४) शेवटचा दिवस असून शेतकऱ्यांनी बियाणे मागणीसाठी अर्ज करावेत, असे आवाहन जिल्हा अधीक्षक कृषी अधिकारी सुधाकर बोराळे यांनी केले आहे.सुधाकर बोराळे यांनी सांगितले, की प्रमाणित बियाणे वितरण या घटकांतर्गत आर्थिक सहाय्य प्रति शेतकरी कमाल १ हेक्टरच्या मर्यादित आहे.

पीक प्रात्यक्षिक ही बाब शेतकरी गट, शेतकरी उत्पादक कंपनी आणि कृषी क्षेत्रात काम करणारी सहकारी संस्था यांच्याद्वारे राबविण्यात येणार आहे. त्यासाठी शेतकरी गट हा ३१ मार्च २०२४ पूर्वी आत्मा, महाराष्ट्र ग्रामीण जीवनोत्ती अभियान, राष्ट्रीय ग्रामीण जीवनोत्ती अभियान, महिला आर्थिक विकास महामंडळ, नाबार्ड यांच्याकडे नोंदणीकृत असावा.

राष्ट्रीय अन्न सुरक्षा आणि पोषण अभियानातून तूर, मूग उडदाचे दहा वर्षांच्या आतील ५ हजार रुपये अनुदानावर व १० वर्षांवरील २५०० रुपये प्रती क्विटंल अनुदानावर तर राष्ट्रीय खाद्यतेल अभियानातून शेतकऱ्यांना सोयाबीन व भुईमूग प्रमाणित बियाणांचे शंभर टक्के अनुदानावर शंभर अनुदानावर वितरण केले जात आहे.

संकेतस्थळावर अर्ज करावेत

राष्ट्रीय अन्न सुरक्षा आणि पोषण अभियानातून तूर, मूग, उडीद, भात, बाजरी, नाचणी, वरई व राष्ट्रीय खाद्यतेल अभियानातून सोयाबीन व भुईमुगाचे प्रात्यक्षिकांसाठी शेतकरी गट, शेतकरी उत्पादक कंपनी आणि कृषी क्षेत्रात काम करणारी सहकारी संस्था यांना शंभर टक्के अनुदान बियाणे दिले जात आहे. बियाणे मागणीसाठी ४ जून शेवटची तारीख असल्याने शेतकरी, संस्थांनी बियाणे मागणीसाठी mahadbt.maharashtra.gov.in या संकेतस्थळावर सादर करावेत. अर्ज करावेत असे आवाहन सुधाकर बोराळे यांनी केले आहे.