Unseasonal Rain: पुणे जिल्ह्यात वादळी पावसाची हजेरी

Pune News: गेल्या चार ते पाच दिवसांपासून जिल्ह्याच्या विविध भागांत जोरदार पाऊस पाऊस पडत आहे. मंगळवारी (ता.१३) सकाळपासून पुणे शहरात अनेक ठिकाणी दमदार हजेरी लावली. अचानक झालेल्या वादळी पावसामुळे पुणे शहरात काही ठिकाणी वीज गायब झाल्याच्या घटना घडल्या असून प्रवाशांची चांगलीच तारांबळ उडाली होती. ग्रामीण भागात तुरळक ठिकाणी हलक्या सरी बरसल्याने शेतकऱ्यांची धांदल उडाली होती.

पुणे शहरासह परिसरात सोमवारी जोरदार सरी बरसल्या. त्यानंतर मंगळवारीही शहराच्या मध्यवर्ती भागात अवकाळी पावसाने हजेरी लावली आहे. सकाळपासून पुणे शहरात ढगाळ वातावरण होते. शहरात ढगाळ वातावरणानंतर अचानक जोरदार अवकाळी पावसाने हजेरी लावली. साडेअकराच्या सुमारास सुरू झालेल्या मुसळधार पावसामुळे शहरात काही काळ गोंधळाची स्थिती निर्माण झाली. उपनगरातील धनकवडी, सिंहगड परिसर, रेल्वे स्टेशन अनेक उपनगरांमध्ये पावसाने हजेरी लावली आहे.

हवामान विभागाने तीन दिवस पावसाचा इशारा दिला आहे. पावसामुळे पुण्यातील अनेक भागांत नागरिकांची धावपळ उडाली आहे. या पावसामुळे तापमानात घट झाली असून, उष्णतेपासून काहीसा दिलासा मिळाला आहे. शहराच्या सर्वच भागात अवकाळी पावसाने वादळी वाऱ्यासह हजेरी लावली. जिल्ह्यात पावसामुळे काढणीच्या अवस्थेत असलेले कांद्याचे पीक पाण्याखाली गेले आहे.

मंगळवारी (ता.१३) सकाळी आठ वाजेपर्यंत पडलेला पाऊस, मिलिमीटरमध्ये

हवामान केंद्र पडलेला पाऊस

नारायणगाव ५४

तळेगाव ढमढेरे ३८.५

हडपसर २२.५

दौंड १५.०

निमगिरी ११.५

राजगुरुनगर ११.०

पाषाण ११.०

शिवाजीनगर २.५

देऊळगाव २.५

मगरपट्टा १.५

कोरेगाव पार्क ०.५

लोणावळा ०.५

माळीण ०.५

चिंचवड १.०